ءۇندىستانعا بارعان وتانداستارىمىز تىرىسقاق اۋرۋىن جۇقتىرىپ العان
ونى ەلگە كەلگەندە ءبىر- اق بىلگەن. ءىشى ءوتىپ، ەسىنەن تانا جازداعان ناۋقاستاردى دارىگەرلەر دەر كەزىندە انىقتاپ، ولاردى دەرەۋ وقشاۋلاپ تاستادى، دەپ حابارلادى ك ت ك ارناسى.
ءۇندىستان. قازاق تۋريستەرىنىڭ تاڭداۋلى مەكەندەرىنىڭ ءبىرى. اسىرەسە، جاعاسىن مۇحيت شايعان ارالدارى تۋريست بىتكەندى قول بۇلعاپ شاقىرىپ تۇرعانداي. دەسە دە، جازى بىتپەيتىن ەلدەگى دەمالىس ءبىزدىڭ جەرلەستەرىمىز ءۇشىن قايعىلى اياقتالا جازدادى. وسى ەلدى اتتاي قالاپ، الماتىدان الىپ- ۇشىپ بارعان ءۇش بىردەي تۋريست تىرىسقاق اۋرۋىن جۇقتىرىپ قايتتى.
سايات قاۋمەتبايەۆ، اۋرۋ جۇقتىرعاندار مەن اسا قاۋىپتى ينفەكتسيالاردى ەپيدەميولوگيالىق قاداعالاۋ ءبولىم جەتەكىشىسى:
- ۇشەۋى دە ينفەكتسيالىق ستاتسيونارعا جاتقىزىلىپ، ۇشەۋىندە دە تىرىسقاق اۋرۋى انىقتالدى. ەگەر شەتەلگە شىعاتىن ازاماتتار بولسا، انتيبيوتيكتەردى وزدەرىمەن الا جۇرگەن دۇرىس.
قاۋىپتى دەرت دەمالىستان قايتىپ كەلگەن كۇنى- اق انىقتالعان. ءىشى ءوتىپ، ەسىنەن تانا جازداعان سوڭ تۋريستەردىڭ ءبىرى اۋرۋحاناعا بارعان. قاۋىپتى اۋرۋ راستالعان سوڭ، دارىگەرلەر بىردەن بىرگە ساياحاتتاعان جولداستارىن دا دەرەۋ تەكسەرۋدەن وتكىزگەن. ال اۋرۋدى جىگىتتىردىڭ گوا ارالىندا جۇقتىرعانى بەلگىلى بولدى. وندا تۋريستەر شيكى ۇلۋ جەپ ۇرىنعان ەكەن. ال تۋراگەنتتىكتەر بولسا، تۋريستەردىڭ تىرىسقاق اۋرۋىن جۇقتىرىپ العانىنا قاتىستى جاۋاپكەرشىلىكتى مويىنعا الۋدان قاشىپ وتىر. ايتۋلارىنشا، بولعان جايتقا تازالىقتى ساقتاماعان تۋريستەردىڭ وزدەرى كىنالى.
اسەل نۇركەبايەۆا، قازاقستان تۋريستتىك اگەنتتىكتەرى قاۋىمداستىعىنىڭ پرەزيدەنتى:
- جولدامانى ساتىپ الاردا تۋريستەرگە ەسكەرتپە- قاعاز بەرىلەدى. وندا نەدەن ساقتانۋ كەرەكتىگى انىق جازىلعان. سوعان قاراعاندا، تۋريستەردىڭ وزىدەرى سالعىرتتىق تانىتقان. تۋراگەنتتىكتەر ءتىپتى دەمالۋشىلارعا اۋرۋلاردان ساقتانۋ ءۇشىن ەكپە الۋدى دا كەڭەس ەتەدى.
قازىر تىرىسقاق اۋرۋىن جۇقتىرعان ءۇش جىگىت وقشاۋلانعان. جالپى، ونداي اۋرۋ ءبىزدىڭ ەلدە اتىمەن جوق ەكەن. تەك وسى ءۇندىستاننان جۇقتىرىپ كەلەتىن كورىنەدى. بىلتىر دا ءدال وسىلاي بەس ادام اۋىرىپ، ءبىر اجالدان امان قالىپتى.
