قازاق سپورتشى قىتاي قۇراماسى ساپىندا پحەنچحان وليمپياداسىنا قاتىسادى
دەپ حابارلايدى قازاقپارات ءتىلشىسى.
قىتايدىڭ حالىق سايتىنىڭ حابارلاۋىنشا، قىتاي ۇلتتىق قۇراماسىن پحەنچحانداعى قىسقى وليمپيادا ويىندارىنا سالتاناتتى شىعارىپ سالۋ ءراسىمى 31 - قاڭتار كۇنى بەيجىڭ قالاسىندا ءوتىپ، دودادا باق سىنايتىن قىتاي سپورتشىلارىنىڭ تولىق ءتىزىمى جاريالاندى. قىتاي ۇلتتىق قۇراماسىنداعى 82 سپورتشى پحەنچحاندا قىسقى سپورتتىڭ 5 تۇرىنەن باق سىنايتىن بولادى.
شىڭجاڭدا تۋىپ وسكەن ۇلتى قازاق سپورتشى ارشىنعازى شاكەن ۇلى بايراقتى باسەكەدە كونكيمەن جۇگىرۋ سپورتىنان 1500 مەترلىك سىندا ونەر كورسەتەتىن بولادى.
شىڭجاڭ كونكيمەن جۇگىرۋ قۇراماسىنىڭ باس باپكەرىنىڭ ايتۋىنشا، 23 جاستاعى قانداسىمىز قۇراما ساپىنا 2010 -جىلى قوسىلىپ، بۇل كۇندە قىتايدىڭ ىشكى بىرىنشىلىگى بويىنشا قۇرىلعان رەيتينگىدە ءبىرىنشى ورىندا تۇر.
سونداي- اق ونىڭ اتاپ وتۋىنشە، سوڭعى 24 جىلدا شىڭجاڭنان قىسقى وليمپيادا ويىندارىنا سپورتشىلار قاتىسپاعان. پحەنچحانداعى ويىندارعا 4 سپورتشى ليسەنزيا الدى.
ايتا كەتەيىك، ارشىنعازى 2017 -جىلى 28 - جەلتوقسان كۇنى قىتايدىڭ كونكيمەن جۇگىرۋ سپورتىنان ىشكى بىرىنشىلىكتە شىڭجاڭ قۇراماسىنىڭ وزگە تاعى ەكى سپورتشىسى - الماس قاقانباي ۇلى جانە ءداستۇر تۇرسىنحان ۇلىمەن بىرگە كوماندالىق سىندا جەڭىمپاز اتاندى.
ەسكە سالايىق، XXIII قىسقى وليمپيادا ويىندارى اقپاننىڭ 9-25 - كۇندەرى ارالىعىندا پحەنچحاندا وتەدى.
اۆتور: مۇحتار قاليموللا ۇلى
