قازاقستان ەسكى كەڭەستىك اسكەري تەحنيكالارىن ساتپاق
بۇل تۋرالى بۇگىن ق ر پارلامەنتى ماجىلىسىندە «قورعانىس ونەركاسىبى جانە مەملەكەتتىك قورعانىستىق تاپسىرىس تۋرالى» زاڭ جوباسىن تانىستىرعان ەلىمىزىدڭ قورعانىس جانە ايەروعارىش ونەركاسىبى ءمينيسترى بەيبىت اتامقۇلوۆ ايتتى، دەپ حابارلايدى قازاقپارات.
ونىڭ ايتۋىنشا، اتالعان زاڭ جوباسىندا پايدالانىلمايتىن اسكەري مۇلىكتەردى قورعانىس جانە اەروعارىش ونەركاسىبى مينيسترلىگىنىڭ قاراۋىنا بەرۋ ۇسىنىلىپ وتىر. بۇعان قوسا، زاڭ جوباسىندا پايدالانىلمايتىن قارۋ- جاراقتار مەن اسكەري تەحنيكالاردى وتاندىق قورعانىس- ونەركاسىپ كەشەنى ۇيىمدارىندا جوندەپ، ەكسپورتقا شىعارۋ شارتىمەن ساتۋ كوزدەلگەن.
«ءبىز پايدالانىلمايتىن مۇلىكتەردى قاراۋىنا بەرۋ قۇقىعىن ەكى كەزەڭمەن جۇزەگە اسىرۋ ۇسىنىلادى. ءبىرىنشى كەزەڭدە «ق ر قورعانىس جانە قارۋلى كۇشتەرى تۋرالى» زاڭعا وزگەرتەۋلەر ەنگىزۋ جولىمەن ەڭ الدىمەن مينيسترلىككە پايدالانىلمايتىن اسكەري مۇلىكتەرگە بيلىك ەتۋ قۇزىرەتىن بەكىتۋ ۇسىنىلادى. ەكىنشى كەزەڭ رەسپۋبليكالىق بيۋدجەتتىك كوميسسيا شارتتارىن ماقۇلداعان جاعدايدا رەسپۋبليكالىق بيۋدجەتتەن قارجى قاراجاتى بولىنگەن جاعدايدا اسكەري بولىمدەردىڭ اۋماعىن ساقتالىپ تۇرعان مۇلىكتەردەن بوساتۋ پروتسەدۋراسىن قامتيدى» ، - دەدى مينيستر.
بەيبىت اتامقۇلوۆتىڭ سوزىنە قاراعاندا، قازاقستاندا سوناۋ كەڭەستىك زاماننان قالعان ەسكى اسكەري تەحنيكالار اسكەري بولىمدەردىڭ قويمالارىندا تۇر. سوندىقتان اتالعان تەحنيكالاردى جوندەپ، جاڭعىرتىپ، ەكسپورتقا شىعارىپ ساتۋ كوزدەلۋدە. ال ساتىلماي قالعان اسكەري مۇلىكتەر جويىلاتىن بولادى.
«بۇل شارالار ەلدىڭ ىشىندە قارۋ- جاراقتىڭ كولەڭكەلى اينالىمىن بولدىرماۋ ءۇشىن ۇسىنىلىپ وتىر» ، - دەدى ول.
