فرانسيا قازاقتارى موڭعوليا قازاقتارىنا كومەك بەردى

موڭعوليانىڭ بايان- ولگي ايماعىندا شامامەن 100 مىڭعا جۋىق قازاق وتباسى تۇرادى. قاڭتار ايىنىڭ ورتاسىندا قىستىڭ قاتتى بولىپ جاتقانىن ەستىگەن فرانسياداعى قازاق قوعامى (AKFT) موڭعوليالىق قازاق وتباسىلارىنا كومىر مەن وزگە دە قاجەتتى زاتتار الۋى ءۇشىن اقشا جيناپ بەرىپتى.

- شامامەن 40 تونناداي كومىر الدىق. ودان بولەك وتىن، كيىم- كەشەك، وقۋشى بالالارعا داپتەر، قالام، قاعاز- قارىنداش الدىردىق. كومىرى جوق وتباسىلارعا ماشينامەن ءتۇسىرىپ بەردىك. كومىر الماعاندار وتىن، كيىم- كەشەك سياقتى زاتتار الدى. مۇندا كەدەي وتباسىلار كوپ، - دەيدى بايان- ولگي تۇرعىنى داكەي بىقي ۇلى.

ونىڭ ايتۋىنشا، بيىل قىس قاتتى بولعاندىقتان ايماقتاعى كوپ وتباسى كومىر تۇسىرەتىن اقشالارى بولماي، قينالىپ قالعان. فرانسيا قازاقتارى جىبەرگەن كومەك قىستىڭ كوزى قىراۋدا ءسال دە بولسا دەمەۋ بولعان.

«بارلىقتارىڭىزعا موڭعولياداعى قازاقتار اتىنان جالىندى سالەم جولدايمىز. جاڭا جىلدارىڭىز قۇت بەرەكە بەرسىن! بالا شاعالارىڭىز، اۋىل ايماق امان با؟ ءبىز دە امان ەسەن، اللانىڭ قۋاتىندا ءجۇرىپ جاتىرمىز. مىنا قاڭتاردىڭ قاقاعان ايازىندا كەدەيلەردى ەسكە الىپ، مۇستافا باۋىرىم (فرانسياداعى قازاق قوعامىنىڭ پرەزدەنتى - م م. ) ءبىراز اۋىلعا كومىر جىبەرگەنىنە قۋانىپ جاتىرمىن. راحمەت! اللانىڭ نۇرى جاۋسىن» دەيدى كومەك العان ازاماتتاردىڭ ءبىرى Facebook-تا جاريالانعان ۆيدەودا.

الەۋمەتتىك جەلىدە وسى سياقتى بىرنەشە العىس- ۆيدەو جاريالانعان.

داكەي بىقي ۇلىنىڭ ايتۋىنشا، فرانتسيا قازاقتارىنىڭ قوعامى بايان- ولگيدەگى قازاقتارمەن تىعىز ارالاسىپ، جاعدايلارىن ءبىلىپ وتىرادى. ەكى جىلدان بەرى قۇربان ايت مەرەكەسىن بىرگە قارسى الىپ كەلەدى ەكەن.

موڭعوليا قازاقتارىنا جاردەم بەرۋمەن اينالىسىپ جۇرگەن 56 جاستاعى مۇستافا ۇسلۋجان فرانسياعا 30 جىل بۇرىن تۇركيادان كوشىپ بارعان. ايەلى - فرانسۋز. ءبىر قىز، ەكى ۇلى بار. بالالارىنىڭ بارلىعى مەديتسينا سالاسىنىڭ ماماندارى. مۇستافا ۇسلۋجاننىڭ ءوزى تەرى تىگۋ سالاسىندا قىزمەت اتقارادى.

- ەكى جىل بۇرىن موڭعوليانىڭ بايان- ولگي دەگەن جەرىنە بارعانمىن. سول جاقتا ءبىزدىڭ تۋىستار بار ەكەن. سولاردى ىزدەپ تاۋىپ، تانىسىپ موڭعوليانى، بايان- ولگيدى ارالادىق. سول كەزدەرى «مۇنداعى اعايىندارعا كومەك كەرەك ەكەن» دەپ ىشتەي ويلاپ كەتكەن بولاتىنبىز. وسىلايشا قۇربان ايت كەلەر كەزدە پاريجدەگى قازاقتارعا: «بۇل جاقتا قۇربان شالۋ قيىن، موڭعولياداعى اعايىن تۋىستارىمىزعا بارىپ، سول جاقتا قۇربان شالايىق» دەگەن ۇسىنىس ايتتىق. وسىلايشا سول جاقتا قۇربان شالدىق. سول ەكى جىلدان بەرى بايان- ولگيدىڭ سول ماڭىنا كومەكتەسىپ كەلە جاتىرمىز، - دەيدى فرانسياداعى قازاق قوعامىنىڭ (AKFT) پرەزيدەنتى مۇستافا ۇسلۋجان ازاتتىق تىلشىسىنە.

فرانسياداعى قازاقتار قوعامىنىڭ دەرەگىنشە، قازىر فرانسيادا 250 دەي قازاق وتباسى تۇرادى. ولاردىڭ 175 ءى قوعامعا مۇشە. پاريجدەن الىستاۋ جەرلەردە تۇراتىندارى قوعامعا ءالى تىركەلمەگەن.

ۇسلۋجاننىڭ ايتۋىنشا، موڭعولياداعى قازاق وتباسىلارىنا كومىر ءتۇسىرىپ بەرۋى ءۇشىن قوعامنىڭ ەلۋ شاقتى ادامى اقشا جيناپ بەرگەن.

بيىل موڭعوليامەن قاتار قازاقستاندا دا قاڭتار ايىندا كۇن قاتتى سۋىپ، شىڭىلتىر اياز كەزىندە بىرنەشە قالادا مەكتەپتەر جابىلىپ، كومىر مەن گاز تاپشىلىعى بايقالعان.

ماقپال مۇقان قىزى

ازاتتىق راديوسى