وزبەكستان ءۇشىن قازاق ءتىلىنىڭ لاتىن گرافيكاسىنا كوشكەنى ماڭىزدى
بۇل تۋرالى وزبەكستان عىلىم اكادەمياسىنىڭ ۆيتسە- پرەزيدەنتى باحروم ابدۋحاليموۆ ءمالىم ەتتى، دەپ حابارلايدى «قازاقپارات» ح ا ا مەنشىكتى ءتىلشىسى.
«لاتىن گرافيكاسىنداعى ءالىپبي ءاردايىم ورتالىق ازيادا قولدانىلىپ كەلەدى جانە نەگىزگى بولىپ سانالعان. وزبەكستان لاتىن گرافيكاسىن شيرەك عاسىر بوي قولدانىپ كەلەدى، سوندىقتان بەلگىلى ءبىر دەڭگەيدە تاجىريبە جيناقتادى. بۇل ۇدەرىستىڭ وڭاي ەمەس ەكەندىگىن بارلىعىمىز تۇسىنەمىز جانە ونى قولدانىسقا ەنگىزۋ ءۇشىن ءبىراز ۋاقىت كەرەك. الايدا، لاتىن گرافيكاسىنداعى الفاۆيت قازاقستان مەن وزبەكستان ءۇشىن وتە ماڭىزدى، سەبەبى ءبىزدىڭ تاريحىمىزدى ونسىز ەلەستەتۋ مۇمكىن ەمەس. سەبەبى، وسى لاتىن گرافيكاسىمەن ءوز ۋاقىتىندا كوپتەگەن كىتاپتار جازىلىپ، ارحيۆتىك قۇجاتتار تولتىرىلعان»، - دەپ اتاپ ءوتتى باحروم ابدۋحاليموۆ وزبەكستانداعى ق ر توتەنشە جانە وكىلەتتى ەلشىسى ەرىك وتەمبايەۆپەن كەزدەسۋ بارىسىندا.
عالىمنىڭ ايتۋىنشا، وزبەكستاندا جاڭا وزبەك ءالىپبيىن قولدانىپ جۇرگەن جاس ۇرپاق وسكەن جانە سايكەسىنشە، ءور عىلىم اكادەمياسى قازاقستاندىق ارىپتەستەرىمەن لاتىن گرافيكاسىنا ءوتۋ بويىنشا جۇمىس تاجىريبەسىمەن بولىسۋگە دايىن.
«بىزدە لاتىن گرافيكاسىنا اۋىسۋ پروتسەسى تولىقتاي اياقتالعان جوق، الايدا قازاقستاندىق ساراپشىلارمەن تاجىريبە الماسۋعا دايىنبىز»، - دەپ تۇيىندەدى ول.
