پاكىستاننان استاناعا جەمىس-جيدەك جەتكىزىلە باستادى

استانا. قازاقپارات - قازاقستاندىق رەفريجەراتورلىق پويىز پاكىستاننىڭ لاحورا قالاسىنان استاناعا جەمىس-جيدەك جەتكىزە باستادى، دەپ حابارلايدى قازاقپارات ق ت ج باسپا ءسوز قىزمەتىنە سىلتەمە جاساپ.

260 توننا ماندارين تيەگەن رەفريجەراتورلىق كونتەينەرلىك پويىزى پاكىستان-يران-تۇرىكمەنستان-قازاقستان مەملەكەتتەرى اۋماعىن، ياعني 5 مىڭ شاقىرىم جولدى 18 كۇندە ءجۇرىپ ءوتتى.

«بۇرىن پاكىستاننان جەمىس-جيدەكتەر اۆتوكولىكپەن جانە تەڭىز كولىگىمەن ۇزاق جۇرەتىن. اسىرەسە، تەڭىز ارقىلى 45 كۇن جۇرەتىن بولسا، ەندىگى جەردە ونىمدەردى جەتكىزۋ مەرزىمى ەكى ەسەگە قىسقاردى»، - دەيدى «KTZ Express» ا ق كونتەينەرلىك تاسىمالداۋ دەپارتامەنتىنىڭ ديرەكتورى ا. كارىموۆ.

«بۇل باعداردى ودان ءارى مەڭگەرىپ، تولىق قۋاتىندا ىسكە قوسۋ ءۇشىن اپتاسىنا ءبىر كونتەينەرلىك پويىزدى جاساقتاۋدى جوسپارلاپ وتىرمىز»، - دەيدى ول.

باسپا ءسوز قىزمەتى تاراتقان مالىمەتتەرگە قاراعاندا، جاڭا لوگيستيكالىق قىزمەت ءتۇرى تەز بۇزىلاتىن جەمىس جيدەكتەردى بەلگىلى تەمپەراتۋرادا جەتكىزۋگە ىقپال ەتەدى. ولاردىڭ قاتارىندا توڭازىتىلعان كوكونىستەر، جەمىس-جيدەكتەر، مەديتسينالىق جانە فارماتسيەۆتيكالىق تاۋارلار بار.