اياز قانداي جاعدايدا ءوزىنىڭ ناقتى تەمپەراتۋراسىنان سۋىق بولىپ سەزىلەدى؟

استانا. قازاقپارات - «قازگيدرومەت» ر م ك ماماندارى «قازاقپارات» ح ا ا تىلشىسىنە كوپتىڭ اۋزىندا جۇرگەن «سەزىلۋ» تەمپەراتۋراسىنىڭ ءمان- ماعىناسىن ءتۇسىندىرىپ بەردى،

  دەپ حابارلايدى «قازاقپارات» ح ا ا ءتىلشىسى.

«تەرمومەتر  مينۋس34 گرادۋستى كورسەتكەنىمەن، كۇننىڭ سۋىقتىعى  مينۋس40 گرادۋس سەكىلدى سەزىلەدى» دەگەن مازمۇنداعى اڭگىمە قازىر كوپتىڭ اۋزىندا ءجۇر.

«سەزىلەدى» نەمەسە اسەرلى تەمپەراتۋرا - مەتەوەلەمەنتتەر كەشەنىنىڭ ادامعا اسەرىن كورسەتەتىن (اۋا تەمپەراتۋراسى مەن جەل جىلدامدىعى)، ەكەۋى دە ءبىر بيومەتەورولوگيالىق يندەكس. ماتەماتيكالىق فورمۋلالاردىڭ ارقاسىندا ادامنىڭ تەمپەراتۋراعا كولەڭكەلى تۇستا كەتىپ بارا جاتقانداعى اسەرىن ەسەپتەپ شىعارۋعا بولادى»، - دەيدى سينوپتيكتەر.

 وسىلايشا، 22 - قاڭتار كۇنى استانادا تاڭعى ساعات التى شاماسىندا اۋا تەمپەراتۋراسىنىڭ كورسەتكىشى مينۋس 34,4 گرادۋس بولىپ، جەل سەكۋندىنا 7 مەتر جىلدامدىقپەن سوققان. وسى ەكى پارامەتردى قولدانا وتىرىپ، سينوپتيكتەر ايازدىڭ مينۋس 58,4 گرادۋس سەكىلدى سەزىلەتىنىن ەسەپتەپ شىعارعان. بۇگىن تاڭعى ساعات التى كەزىندە اۋا تەمپەراتۋراسى مينۋس 37,5 گرادۋستى، سەكۋندىنا 6 مەتر جەل جىلدامدىقتى كورسەتكەن. تەمپەراتۋرا 55,5 گرادۋس سەكىلدى سەزىلگەن.

ت ج كوميتەتى دىمقىل كۇيدە، جەلدىڭ قاتتى سوعىپ تۇرعان شاعىندا ادام سۋ كيىممەن تۇرعان جاعدايدا اۋا تەمپەراتۋراسى ءنولدى كورسەتىپ تۇرسا دا، كىسىنىڭ ۇسىككە شالدىعۋى مۇمكىن ەكەنىن ەسكەرتەدى. ەگەر ادام اش نەمەسە شارشاڭقى، سىرقات نەمەسە ماس بولسا، ءۇسىپ قالۋ قاۋپى اسقىنا تۇسەدى.

ءتىننىڭ (تكان) ءۇسۋ دەڭگەيى ءارتۇرلى. العاشقى دەڭگەيدە دەنە قىزارىپ، دومبىعىپ ءىسىنىپ كەتەدى. ەكىنشى كەزەڭىندە دەنەدە قابىرشاق پايدا بولسا، ءۇشىنشى كەزەڭىندە تەرى جانسىزدانادى. ءتورتىنشى كەزەڭدە ادامنىڭ دەنە مۇشەلەرى، ماسەلەن ساۋساقتارى جانسىزدانادى.

 مامانداردىڭ ايتۋىنشا، ۇسىكتەن زارداپ شەككەن ادامدى بىردەن جىلىتۋعا بولمايدى. مىسالى، ونداي ادامدى جىلى ۆانناعا نەمەسە گرەلكاعا، وتقا جاقىنداتپاعان ابزال. سەبەبى، مۇنداي جاعدايدا زاقىمدالعان تىندەرگە بىردەن جىلۋ جەتىپ، قانعا وتتەگى بارماي قالۋى ىقتيمال. مۇنىڭ ارتى ينفەكسيانىڭ پايدا بولۋىنا اكەپ سوعادى. ادامدى جىلىتۋ ءۇشىن الكوگول ىشكىزۋدىڭ دە زيانى بارشىلىق.

توڭىپ قالعان ادامنىڭ قولى نەمەسە اياعىن باپپەن ءوز قولىڭىزبەن نەمەسە شاشاقتى مويىنوراعىشپەن ىسقىلاعان ءجون. قولعاپتى شەشىپ، قولدى ۇرلەپ جىلىتىپ، وكشەنى جوعارىدان تومەنگە قاراي ىسقىلاعان دۇرىس.

ادامدى قاتتى ۇسىك شالعاندا (ەسىنەن تانىپ قالسا) زاقىم كەلگەن مۇشەنى جىلى جاپقىشتارمەن، مۇمكىندىك بولسا بىرنەشە قابات ماقتامەن، داكەمەن وراپ تاستاۋ كەرەك. سودان كەيىن بىردەن جىلى ورىنعا جەتكىزۋگە تىرىسقان ابزال. ەڭ دۇرىسى، دارىگەردى بىردەن شاقىرۋ كەرەك. ورالعان اياقتى نەمەسە قولدى دارىگەر كەلگەنشە شەشپەگەن دۇرىس.

ۇسىك شالسا، كەز كەلگەن جىلى سۋسىندى (كوفە، شاي، ءسۇت)، اسپيرين نەمەسە انالگيندى ىشكەن دۇرىس. سونىمەن بىرگە نوشپانىڭ ەكى تابلەتكاسىن، كورۆالولدىڭ نەمەسە ۆالوكورديننىڭ 15-20 تامشىسىن جۇتقان ءجون. ودان كەيىن ءتىلدىڭ استىنا ۆاليدولدىڭ نەمەسە نيتروگليتسەريننىڭ تابلەتكاسىن سالىپ قويىپ، دارىگەردى كۇتۋ كەرەك.

اۆتور: ايان بەكەن ۇلى