اكىمدىك استانالىقتاردى قايىرىمدى قالا تۇرعىندارى بولۋعا شاقىردى

استانا. قازاقپارات - استانا قالاسى اكىمدىگى قاتتى ايازعا بايلانىستى تۇرعىنداردى تاعى دا قايىرىمدى بولۋعا شاقىردى، دەپ حابارلايدى قازاقپارات.

«اۋا رايىنىڭ كۇرت سۋىتۋىنا بايلانىستى تۇرعىلىقتى مەكەنجايى جوق ادامداردى كورسەڭىزدەر تاۋلىك بويى جۇمىس ىستەپ تۇرعان 531648، 87016548999 تەلەفوندارىنا حابارلاسۋلارىڭىزدى سۇرايمىز. الەۋمەتتىك قىزمەت العاشقى دارىگەرلىك كومەك كورسەتۋ جانە ولاردى ارنايى بەيىمدەۋ ورتالىعىنا جەتكىزۋ بويىنشا بارلىق ءتيىستى شارالاردى جاسايتىن بولادى»، - دەپ جازادى استانا قالاسى اكىمىنىڭ باسپا ءسوز حاتشىسى ەلۆيرا جۇرگەنبايەۆا فەيسبۋكتەگى پاراقشاسىندا.

ەسكە سالا كەتەيىك، استانا قالاسىنىڭ اكىمى اسەت يسەكەشەۆ الداعى كۇندەرى تەمپەراتۋرانىڭ تومەندەۋىنە بايلانىستى قالا تۇرعىندارىن قاۋىپسىزدىك شارالارىنا نازار اۋدارۋعا شاقىرعاندىعى تۋرالى بۇعان دەيىن جازعان بولاتىنبىز.

سونداي-اق، بۇگىن قازاقپارات ءتىلشىسى استانا قالاسىنىڭ تۇرعىندارى قالانىڭ مەملەكەتتىك قىزمەتشىلەرىنىڭ ءبىر-بىرىنە كومەك بەرۋ باستاماسىنا ءۇن قوسىپ جاتقاندىعى تۋرالى دا جازدى.

قازگيدرومەت تاراتقان مالىمەتتەرگە قاراعاندا، 22- قاڭتاردان باستاپ، اسىرەسە 23-26- قاڭتار ارالىعىندا اۋا-رايى كۇرت سۋىتىپ، اۋا تەمپەراتۋراسى -35 - 40 گرادۋسقا دەيىن تومەندەۋى مۇمكىن.