اۋعانستاندا سودىرلاردىڭ شابۋىلى سالدارىنان قازاقستان ازاماتى اجال قۇشتى
«اۋعانستاننان قايعىلى حابار جەتتى. بۇگىن تاڭەرتەڭ 1978-جىلى تۋعان قازاقستان ازاماتى سودىرلاردىڭ كابۋلداعى Intercontinental قوناق ۇيىنە شابۋىلى سالدارىنان اجال قۇشتى. قازا بولعان ازاماتتىڭ جاقىندارى مەن تۋعان-تۋىستارىنا قايعىرا كوڭىل ايتامىز»، - دەپ جازدى فەيسبۋكتەگى پاراقشاسىنا ءانۋار جايناقوۆ.
ونىڭ ايتۋىنشا، قازاقستاندىق ديپلوماتتار اۋعانستاننىڭ قاۋىپسىزدىك قىزمەتى مەن سىرتقى ىستەر مينيسترلىگىنىڭ وكىلدەرىمەن ۇنەمى بايلانىسىپ وتىر.
«جاقىن كۇندەرى مەرت بولعان ازاماتتىڭ دەنەسىن وتانىنا جەتكىزۋدى ۇيىمداستىرۋ بويىنشا ماسەلەلەر شەشىلەتىن بولادى»، - دەپ قوسىپ ءوتتى جايناقوۆ.
بۇعان دەيىن حابارلانعانداي، قارۋلانعان ءبىر توپ ادام اۋعانستان استاناسىندا ورنالاسقان «ينتەركونتينەنتال» قوناق ۇيىندە ادامداردى تۇتقىنعا العان بولاتىن.
بەلتانىڭ جازۋىنشا، قارۋلانعان سودىرلار نەگىزگى ەسىكتەن كىرىپ، ىشكە ەنگەن. بۇل ۋاقىتتا عيماراتتا ۇيلەنۋ تويى نەمەسە وزگە دەرەككوزدەرگە سايكەس، كونفەرەنتسيا ءوتىپ جاتقان. ولار ءىس-شاراعا قاتىسۋشىلارعا قارسى وق اشقان. سودىرلاردىڭ اراسىندا جانكەشتى- لاڭكەستەر دە بولعان. وقيعاعا كۋا بولعاندار ءۇش جارىلىس جاسالعانى تۋرالى حابارلادى.
قازا بولعان جانە زارداپ شەككەن 35 ادام تۋرالى ايتىلۋدا. پوليتسەيلەر قوناقۇيدەن ادامداردىڭ باسىم دەنىن قاۋىپسىز جەرگە شىعارىپ ۇلگەرگەن.
