قۇلاققاپتىڭ پايداسى مەن زيانى: دارىگەر ايگۇل شاكەتوۆانىڭ كەڭەسى

استانا. قازاقپارات - بۇگىنگى جاستار ۇيالى تەلەفونعا ءجيى ءۇڭىلىپ، كوزدەرىنىڭ كورۋىن ناشارلاتۋمەن قاتار، قۇلاقتارىنا ۇنەمى قۇلاققاپ سالىپ ءجۇرۋ ارقىلى ەستۋ قابىلەتتەرىنەن ايىرىلۋدا.

بۇل تۋرالى د. قالماتايەۆ اتىنداعى سەمەي مەملەكەتتىك مەديتسينا كوللەدجىنىڭ ابك ءتورايىمى، جارتىلىستانۋ عىلىمدارى بويىنشا عىلىمي پاندەر تسيكلىنىڭ مەڭگەرۋشىسى ايگۇل شاكەتوۆا ايتتى، دەپ حابارلايدى ltaynews.kz.

«مۋزىكا تىڭداعان دۇرىس-اق، ءبىراق قۇلاققاپپەن ەمەس، راديودان، ماگنيتافوننان دا تىڭداسا بولادى، جاستارىمىز وسىنى ەسكەرسە ەكەن. قۇلاققاپ بىزگە ىڭعايلى، جاقسى بولىپ كورىنگەنمەن، ۋاقىت وتە كەلە ونىڭ قانداي اۋرۋلارعا شالدىقتىراتىنىن ەسكەرە بەرمەيمىز. بار قاتەلىگىمىز وسىندا. ادام قۇلاققاپتى پايدالانعاندا بىرتىندەپ كەرەڭدىك اۋرۋىنا تاپ بولادى. ونىمەن قوسا، وزىنە ارتىق راديوتولقىن مەن شەكتەن تىس بيوتوك قابىلدايدى.

بۇل اعزادا ءارتۇرلى اۋرۋلار تۋعىزادى. زەرتتەۋ بارىسىندا قۇلاققاپتى ۇزاق ۋاقىت، ماسەلەن 3 ساعاتتان ارتىق تىڭداعاندا ادامنىڭ باس ميىنىڭ تامىرلارى تارىلىپ، وتتەگى جەتكىلىكسىزدىگىنەن باس اۋرۋى پايدا بولاتىندىعى انىقتالدى. بۇنى مەن دارىگەر- مامان رەتىندە ەسكەرتەمىن. سونىمەن قاتار اشۋشاڭدىق، ۇرەيلەنۋ، ياعني سترەسس داميدى. ەڭ قاۋىپتىسى - قۇلاققاپتىڭ قۇرامىندا ماگنيتتى دىبىس تاراتاتىن قۇرىلعى ورنالاسقاندىقتان بۇل قۇرىلعىنىڭ ەلەكتر ەنەرگياسىن كوپ قاجەت ەتەتىندىگى بار. كوپشىلىك قۇلاققاپ پايدالانۋشىلاردىڭ تەلەفون قۋاتى تەز ءسونىپ قالاتىنى دا وسى سەبەپتەن.

قۇلاققاپتىڭ بىردەن اسەر ەتەتىن مۇشەسى - قۇلاق. ەڭ ءبىرىنشى كورىنەتىن، بەلگى بەرەتىن اۋرۋ - كەرەڭدىك. ادام قۇلاعى ەستىمەگەندىكتەن كوپ اقپاراتتاردى دۇرىس قابىلداي المايدى. ۋاقىت وتە كەلە، جاسى 45-تەن اسقاننان كەيىن ەستۋى ءتىپتى قيىنعا سوعۋى مۇمكىن»، - دەيدى ايگۇل شاكەت قىزى.

ۇستازدىڭ ايتۋىنشا، قۇلاققاپ ارقىلى ءارتۇرلى ميكرواعزالار دەنەگە تارالۋى مۇمكىن. بۇل قۇلاقتىڭ وتيت، پاروتيت اۋرۋلارىنا الىپ كەلەدى. وسىنىڭ الدىن الۋ ءۇشىن قۇلاققاپتى قۇلاققا سالار الىندا 70 پايىزدىق سپيرتپەن وڭدەپ، تازارتىپ العان ءجون.

عالىمداردىڭ زەرتتەۋ ناتيجەسى بويىنشا، قازىرگى كەزدە ەڭ كوپ ميكرواعزالار ۇيالى تەلەفون، قۇلاققاپ جانە اقشادا تارالعان. سوندىقتان قۇلاققاپتى پايدالانۋدى بىرتە- بىرتە قىسقارتۋ كەرەك. كۇنىنە 1 ساعاتتان ارتىق تىڭداۋعا بولمايدى. وسى ۋاقىتتىڭ ىشىندە دە ادام راديوتولقىندى قابىلدايتىندىعىن ۇمىتپاۋ قاجەت.

دەگەنمەن، قۇلاققاپتىڭ پايداسى دا بار بولىپ شىقتى. مىسالعا ونى ۇيالى تەلەفونمەن ەكىنشى ءبىر اداممەن سويلەسكەندە، سەنسورلى تەلەفوننان بولىنەتىن راديوتولقىندى ازايتۋ ءۇشىن قولدانۋعا بولادى. بۇل رەتتە، ءبىر ورىندا تۇرىپ سويلەسكەن ءجون ەكەن.