اۋە تاسىمالداۋشىلار قازاقستانداعى اۋەجايلارعا وكپەلى
«2017-جىلى ماۋسىمدا اۋەجايلار ەنگىزەتىن حالىقارالىق رەيستەرگە باعانى مەملەكەت رەتتەۋدى توقتاتتى. ياعني، اتالعان رەتتەۋدى توقتاتۋ سالدارى تەك حالىقارالىق رەيستەرگە قازاقستانداعى اۋەجايلىق تاريفتەردىڭ ارتۋىنا الىپ كەلدى. سونىمەن قاتار اۋە تاسىمالىنداعى جوعارى وتىن قۇنىن ەسكەرە وتىرىپ، شەتەلدىك ەكى اۋە كومپانياسى رەيستەردەن باس تارتتى، ال تاعى بىرنەشەۋى تاسىمال جيىلىكتەرىن قىسقارتۋدا»، - دەپ توقتالدى دجوردان كارامالاكوۆ ەلوردادا وتكەن باسپا ءسوز ءماسليحاتىندا.
ونىڭ سوزىنە قاراعاندا، وتكەن جىلدىڭ سوڭىنا قاراي شەتەلدىك تاسىمالداۋشىلار ءۇشىن وتىن باعاسى 20 پايىزعا ءوستى. وسى جاعدايلاردى ەسكەرە كەلە، اۋە تاسىمالداۋشىلارى وزدەرىنىڭ اۆياتسيالىق قىزمەتىن جوسپارلاۋعا قاۋقارسىز بولاتىنداي جاعداي تۋىنداپ وتىر.
ءوز كەزەگىندە «ەير استانا» اۋە كومپانياسىنىڭ قارجى جونىندەگى اتقارۋشى ديرەكتورى يبراحيم جانلىەل استانادان باعدارلىق جەلىنى دامىتۋعا نۇقسان كەلتىرەتىن تاۋەكەلدەر بار ەكەنىن، بۇل تۇرعىدا رەيستەردىڭ قىسقارۋى مۇمكىن ەكەنىن اتاپ ءوتتى.
بۇدان بولەك، «سكات» اۋە كومپانياسىنىڭ كوممەرتسيالىق ديرەكتورى نيكولاي بۋرياكوۆ تاريفتەردىڭ ەلەۋلى ءوسىمى كوپتەگەن قازاقستاندىق اۋەجايلاردا بايقالىپ وتىرعانىن جەتكىزدى.
ونىڭ ايتۋىنشا، اقتوبە، اتىراۋ اۋەجايلارىندا كورسەتىلەتىن قىزمەتتەردىڭ قۇنى ارتقانىن، بۇل جاعداي تاسىمالداۋشىلار ءۇشىن قولايسىز بولىپ تۇرعانىن ءسوز ەتتى.
اۆتور: رۋسلان عابباسوۆ
