وسكەمەندە قىتاي ستاندارتتارىنا ساي سەرتيفيكاتتايتىن زەرتحانا اشىلادى
بۇل تۋرالى وبلىس باسشىسى دانيال احمەتوۆ اكىمدىكتىڭ جيىنىندا ايتتى، دەپ حابارلايدى قازاقپارات.
شىعىس قازاقستان وبلىسى قىتايعا اۋىل شارۋاشىلىق تاۋارلاردى ەكسپورتتاۋدى بىلتىر قولعا الدى. ەكىجاقتى كەلىسسوزدەر ناتيجەسىندە قىتاي تاراپى شىعىس قازاقستان اۋماعىندا زەرتحانا اشۋعا قارجى بولەتىن بولعان. بۇل زەرتحانا جەرگىلىكتى اۋىلشارۋاشىلىق ونىمدەردى قىتايلىق ستاندارتتار بويىنشا سەرتيفيكاتتاۋى ءتيىس. باستاپقى كەزەڭدە زەرتحانادا قىتايلىق ماماندار جۇمىس ىستەپ، جەرگىلىكتى قىزمەتكەرلەردى قوندىرعىلارمەن جۇمىس ىستەۋدى ۇيرەتەتىن بولادى. زەرتحانا بەرگەن سەرتيفيكاتپەن فەرمەرلەر ءوز ونىمدەرىن قىتاي نارىعىنا ەمىن- ەركىن وتكىزۋگە مۇمكىندىك الماق.
«ەكى جىل بويى قىتايعا جاساعان ساپارلاردىڭ ناتيجەسىندە كورشىلەرمىز بىزگە ءبىر ميلليارد تەڭگەنىڭ قوندىرعىلارىن قايتارىمسىز نەگىزدە بەرەتىن بولدى. ەندى زەرتحاناعا لايىق عيمارات تاۋىپ، قوندىرعىلاردى ورناتۋ كەرەك. سوڭعى 10 جىلدىڭ ىشىندە قىتاي حالقىنىڭ تۇتىنۋ قابىلەتى ەسەلەپ ءوستى. سوندىقتان ءبىزدىڭ تابيعي ونىمدەر ول جاقتا جاقسى باعاعا ساتىلادى» ، - دەدى د. احمەتوۆ.
قىتايدىڭ ازىق- تۇلىك تاۋارلارىنا قويلاتىن تالاپتارى الەمدەگى ەڭ قاتاڭ ستاندارت سانالادى. تەك اۋىل شارۋاشىلىعىنا قاتىستى 600 دەن استام ستاندارت بار. قازىرگى تاڭدا شىعىس قازاقستاننان بۇل ەلگە كۇنباعىس مايى مەن بال ونىمدەرى عانا كەدەرگىسىز وتۋدە. ال داقىلدار مەن ەت- ءسۇت ونىمدەرىن ءوز بەتىمەن سەرتيفيكاتتاۋ فەرمەرلەر ءۇشىن مۇمكىن بولماي تۇر.
ەسىمجان ناقتىباي ۇلى
