ساۋد ارابياسىندا العاش رەت ايەلدەر اۆتوسالونى اشىلدى - فوتو
ەلدە كۇزدەن باستاپ ايەلدەرگە كولىك جۇرگىزۋگە رۇقسات بەرىلگەن ەدى. بۇل تۋرالى Reuters حابارلادى.
ايەلدەر Le Mall ساۋدا ۇيىندەگى ءار ءتۇرلى شارلارمەن بەزەندىرىلگەن زالداعى كولىكتەر كورمەسىن تاماشالاپ، ولارمەن سۋرەتكە ءتۇستى.
«مەن نەگىزى كولىككە قىزىعامىن. ءبىراق، بۇرىن ءبىزدىڭ كولىك ايداۋعا قۇقىعىمىز بولمادى. قازىر وزىمە ۇنايتىن، باعاسى قاتتى قىمبات ەمەس كولىك ساتىپ العىم كەلەدى»، - دەيدى گادا ءال- الي ەسىمدى كورمەگە كەلۋشى.
ايەلدەرگە ارنالعان اۆتوسالونعا كەلۋشىلەرگە تەك ايەلدەر قىزمەت كورسەتەدى. بۇل ساۋدا ورتالىعىن باسقارۋشى دا، كاسسير دە، مەيرامحانا قىزمەتكەرلەرى دە ايەل ادامدار. 2017 -جىلدىڭ قىركۇيەگىندە ساۋد ارابياسىنىڭ كورولى ايەلدەرگە ەر ادامدارمەن قاتار كولىك جۇرگىزۋگە رۇقسات بەرۋ تۋرالى زاڭعا قول قويدى. بۇعان دەيىن بۇل ەل الەم بويىنشا كولىك ايداۋعا تىيىم سالىنعان جالعىز ەل بولاتىن.
