تۇرعىن ءۇي قۇرىلىس جيناق بانكىندە قانداي وزگەرىستەر بولۋى مۇمكىن
«مەملەكەت نەگىزگى اكسيونەر رەتىندە قالا بەرەدى جانە بانك ءوزىنىڭ بارلىق الەۋمەتتىك قىزمەتتەرى مەن مىندەتتەمەلەرىن ساقتاپ قالادى. بۇل تۋرالى بيىل استانادا وتكەن ۇكىمەت وتىرىسى بارىسىندا تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا حابارلادى. شارا اياسىندا مەملەكەتتىك كاسىپورىنداردىڭ جەكەشەلەندىرۋىن ۇيىمداستىرۋ ماسەلەسى قاراستىرىلعان بولاتىن» ، - دەپ ناقتىلادى اتالعان بانكتىڭ باسپا ءسوز قىزمەتى.
«مەملەكەت باسشىسى جولداۋىندا تۇرعىن ءۇي قۇرىلىس جيناق بانكى جۇزەگە اسىرىپ وتىرعان تۇرعىن ءۇي قۇرىلىس جيناق جۇيەسىنىڭ تيىمدىلىگىن ەرەكشە اتاپ وتكەن بولاتىن. بۇل جۇيە حالىقتىڭ ۇلكەن بولىگى ءۇشىن باسپانانى قولجەتىمدى ەتىپ وتىر. قازىرگى كەزدە بانك ىزدەستىرىپ جاتقان ستراتەگيالىق سەرىكتەس وسى باعىتتاعى جۇمىستى جاقسارتۋعا كومەكتەسەدى. مۇنداي ۇيىم رەتىندە ءبىز تۇرعىن ءۇي قۇرىلىس جيناق بانكىنىڭ ءارى قارايعى ساپالى دامۋىن قامتاماسىز ەتەتىن، حالىقارالىق تاجىريبەسى بار، وسى سالادا ماماندانعان، تۇراقتى قارجى ينستيتۋتىن كورىپ وتىرمىز. بۇل مامىلەدەن ءبىرىنشى كەزەكتە كليەنتتەرىمىز ۇتادى، سەبەبى ولار تەحنولوگيالىق تۇرعىدان دامىعان قىزمەتتى الىپ، ەڭ ءتيىمدى دەگەن ونىمدەردى پايدالاناتىن بولادى» ، - دەپ ءتۇسىندىردى ءلاززات يبراگيموۆا.
ول نەسيەلەندىرۋ مولشەرلەمەلەرىنە قاتىستى قازىرگى قولدانىستاعى بارلىق جەڭىلدەتىلگەن شارتتار تولىق كولەمدە ءوز كۇشىندە قالاتىنىن اتاپ ءوتتى.
ايتا كەتۋ كەرەك، ينۆەستوردىڭ كەلۋى بانك سالىمشىلارىنا بەرىلەتىن مەملەكەتتىك سىيلىق اقىعا ەش ىقپال ەتپەيدى. مەملەكەتتىك سىيلىق اقىنى تولەۋ نورمالارى «قازاقستان رەسپۋبليكاسىنداعى تۇرعىن ءۇي قۇرىلىسى جيناق اقشاسى تۋرالى» زاڭدا بەكىتىلگەن.
سونىمەن قاتار، تۇرعىن ءۇي قۇرىلىس جيناق بانكى نەگىزگى وپەراتور رەتىندە «نۇرلى جەر» مەملەكەتتىك باعدارلاماسىن جۇزەگە اسىرۋعا قاتىسۋىن جالعاستىرادى. جوبا اياسىندا وتكەن جىلى تۇرعىن ءۇي قۇرىلىس جيناق بانكى ارقىلى 8672 پاتەردەن تۇراتىن 145 ءۇي پايدالانۋعا بەرىلگەن بولاتىن. وسى جىلى 7981 پاتەردەن تۇراتىن 95 ءۇي مەن الماتى، جامبىل، سولتۇستىك قازاقستان جانە اقتوبە وبلىستارىنداعى 414 جەكە كوتتەدج ءوز يەلەرىن تابادى دەپ جوسپارلانىپ وتىر.
اۆتور: رۋسلان عابباسوۆ
