ۇستازداردىڭ مارتەبەسىن كوتەرۋ بويىنشا بىرلەسكەن جۇمىستاردى اتقارۋ كەرەك - سايروۆ

استانا. قازاقپارات - ق ر كاسىپوداقتار فەدەراتسياسى ءتوراعاسىنىڭ ورىنباسارى ەرلان سايروۆ ەلباسىنىڭ قازاقستان حالقىنا جولداۋى بويىنشا ءوز پىكىرىن ءبىلدىردى، دەپ حابارلايدى قازاقپارات.

«پرەزيدەنتتىڭ جولداۋى وپتيميستىك مانگە يە بولىپ وتىر. قازاقستان الەمدىك ەكونوميكالىق كەڭىستىكتىڭ بولىگى بولعاندىقتان، ءبىز ۇنەمى الەمدىك الەۋمەتتىك- ەكونوميكالىق ۇردىستەردى سارالاپ، ونىڭ فارۆاتەرىندە بولۋىمىز كەرەك. الەمدە جاپپاي سيفرلاندىرۋ پروتسەسى ءجۇرىپ جاتىر. وسى ورايدا قازاقستان بۇل ءىرى وزگەرىستەرگە ساقاداي ساي تۇرۋى ءتيىس. بۇل رەتتە پرەزيدەنتتىڭ جولداۋى كوپتەگەن ماسەلەلەردى قامتىپ وتىر»، - دەپ توقتالدى ە. سايروۆ.

ساياسات تانۋشىنىڭ سوزىنە قاراعاندا، قازىرگى كەزدە دۇنيەجۇزىندە الەۋمەتتىك- ەڭبەك قاتىناستارىندا ەلەۋلى وزگەرىستەر ورىن الۋدا. ەلىمىز وزىق وزگەرىستەردەن قالىپ قويماۋى ءۇشىن ءتورتىنشى ونەركاسىپتىك ريەۆوليۋتسيانىڭ قامتىپ وتىرعان قادامدارى وتە ماڭىزدى بولىپ وتىر.

«مەملەكەت سيفرلاندىرۋ پروتسەستەرىنە ايرىقشا ءمان بەرىپ وتىرعانى ءمالىم. ەگەر دە بۇگىندە سيفرلىق تەحنولوگيالاردى يەلەنبەسەك، وندا ءبىز تاريحي دامۋدان شەتكەرى قالاتىنىمىز تۇسىنىكتى»، - دەپ ناقتىلادى ول.

بۇدان بولەك ە. سايروۆ پرەزيدەنت جولداۋىندا ادامي كاپيتالدى دامىتۋعا ەرەكشە ەكپىن قويىلىپ وتىرعانىن، سونداي-اق بۇل ەڭ قاجەتتى قادامنىڭ ءبىرى ەكەنىن العا تارتتى.

«ادامي كاپيتال مەملەكەتتىك ەكونوميكالىق ءوسىمى مەن الەۋمەتتىك دامۋىنىڭ باستى تالابى مەن ىرگەتاسى»، - دەيدى ساياساتتانۋشى.

سونىمەن قاتار ول مۇعالىمدەردىڭ ەلەۋلى ەڭبەگىنە لايىقتى باعا بەرىلىپ وتىرعاندىعىن ءسوز ەتتى.

«جولداۋدا مۇعالىمدەردىڭ ەڭبەكاقىسىن جوعارىلاتۋ تۋرالى ايتىلعان. مەنىڭ ويىمشا، بۇل باعىتتاعى شەشىم مەملەكەت باسشىسى جولداۋىنىڭ ماڭىزدى اسپەكتىلەرىنىڭ ءبىرى. مۇعالىمدەر مەن وقىتۋشىلاردىڭ ءومىر ءسۇرۋ دەڭگەيىنە، مورالدىق جاعدايىنا كوپ ماسەلە تىعىز بايلانىستى. ولاردىڭ ەلەۋلى ەڭبەگىنە لايىقتى باعا بەرىلە باستادى. ەندى ولاردىڭ قوعامدىق مارتەبەسى تۇرعىسىنداعى جۇمىسقا قىزۋ كىرىسۋ كەرەك. بۇل رەتتە ازاماتتىق قوعام مەن مەملەكەتتىك بىرلەسكەن ءىس- قيمىلىنا ەكپىن قويعان ءجون»، - دەپ تۇيىندەدى ءسوزىن ەرلان سايروۆ.

ايتا كەتەيىك، بۇگىن جاريالانعان قر پرەزيدەنتى نۇرسۇلتان نازاربايەۆتىڭ قازاقستان حالقىنا جولداۋىندا ۇستازدار جالاقىسىن ارتتىرۋ قادامدارى ەسكەرىلگەن.

«مۇعالىم مارتەبەسىن ارتتىرۋ ماقساتىمەن ءبىلىم بەرۋدىڭ جاڭارتىلعان مازمۇنىنا كوشكەن ۇستازداردىڭ لاۋازىمدىق جالاقىسىن 2018 -جىلدىڭ 1 -قاڭتارىنان باستاپ 30 پروتسەنتكە كوبەيتۋدى تاپسىرامىن. جاڭارتىلعان مازمۇن دەگەنىمىز - حالىقارالىق ستاندارتتارعا ساي كەلەتىن جانە نازاربايەۆ زياتكەرلىك مەكتەپتەرىندە بەيىمدەلۋدەن وتكەن زاماناۋي وقۋ باعدارلامالارى. بۇلار ءبىزدىڭ بالالارىمىزعا قاجەتتى فۋنكسيونالدىق ساۋاتتىلىق پەن سىني تۇرعىدان ويلاۋ قابىلەتىن دارىتادى. سونىمەن قاتار 2018 -جىلى كاتەگوريالار اراسىنداعى الشاقتىقتى ارتتىرىپ، مۇعالىمدەر ءۇشىن بىلىكتىلىك دەڭگەيىن ەسكەرەتىن كاتەگوريالاردىڭ جاڭا كەستەسىن ەنگىزۋدى تاپسىرامىن. كاتەگوريالاردى بۇكىل الەمدە قولدانىلىپ جۇرگەن ۇلتتىق بىلىكتىلىك تەست ارقىلى بەرۋ كەرەك. بۇل پەداگوگتاردى وزدەرىن ۇدايى جەتىلدىرۋگە ىنتالاندىراتىن بولادى. ناتيجەسىندە، مۇعالىمدەردىڭ جالاقىسى بىلىكتىلىگىنىڭ راستالۋىنا بايلانىستى تۇتاستاي العاندا 30 پروتسەنتتەن 50 پروتسەنتكە دەيىن وسەدى»، - دەلىنگەن جولداۋدا.