لاتىن ءالىپبيى دۇنيە ءجۇزى قازاقتارىن بىرىكتىرەدى - مۇحتار ءابىلحاق

استانا. قازاقپارات - لاتىنعا ءوتۋ تاريحي شەشىم. ونىڭ جەمىسىن كەلەر ۇرپاق كورەتىنىنە كۇمان جوق. بەيجىڭدەگى ورتالىق ۇلتتار ۋنيۆەرسيتەتى قازاق ءتىلى جانە ادەبيەتى كافەدراسىنىڭ پروفەسسورى مۇحتار ءابىلحاق وسىلاي دەيدى.

قازاقستان زامان تالابىنا ساي جازۋىن جاڭعىرتۋ ارقىلى دۇنيە جۇزىندەگى ءارتۇرلى ءارىپتى تانيتىن قازاقتاردى جاقىنداستىرادى. سوندىقتان ەلباسىنىڭ ءالىپبي اۋىستىرۋ تۋرالى باستاماسى باتىل ءارى قاجەتتى شەشىم بولدى دەگەن پىكىردە.

مۇحتار ءابىلحاق، بەيجىڭدەگى ورتالىق ۇلتتار ۋنيۆەرسيتەتىنىڭ پروفەسسورى:

 - ءبىر ۇلتتىڭ بىرنەشە ءارىپتى پايدالانۋى، ولاردىڭ ءوزارا يدەيا الماستىرۋىنا ءبىر- بىرىنەن مادەنيەت ۇيرەنۋىنە ەرەكشە ناشار ىقپالىن كەلتىرىپ كەلەدى. قازىر دە سولاي. اسىرەسە جاستار جاعىنان ايتقان كەزدە بىرەۋىنىڭ جازۋىن بىرەۋى تانىمايدى. دۇنيە جۇزىندەگى قازاقتار ءبىر ءارىپتى قولداناتىن بولسا مەنىڭشە، جوعارىداعى ماسەلەلەر شەشىلەر ەدى.