استانادا «گارموشكا» اۆتوبۋستار سانىن كوبەيتۋ كوزدەلىپ وتىر

 استانا. قازاقپارات - ەلوردا اكىمدىگى قالاىشىلىك قوزعالىستى رەتتەۋ ءۇشىن قوسارلانعان اۆتوبۋستاردىڭ سانىن ارتتىرۋدى جوسپارلاۋدا.

 بۇل تۋرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا استانا قالاسىنىڭ جولاۋشىلار كولىگى باسقارماسىنىڭ باسشىسى بەكمىرزا يگەنبەردينوۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«كۇن سايىن ءىشى جولاۋشىعا %90 عا تولعان اۆتوبۋستار بويىنشا تالداۋ جۇرگىزىلەدى. ءبىزدىڭ ماقساتىمىز - اۆتوبۋستارداعى جولاۋشىلاردىڭ تولىمدىلىق كورسەتكىشىن%70-80 عا دەيىن ازايتۋ. سەبەبى، بۇل باقىلاۋشىلاردىڭ جۇمىسىن جەڭىلدەتەدى ءارى جولاۋشىلارعا دا قاۋىپسىز. ياعني، بۇل كورسەتكىشكە جەتسەك، ادامدار اۆتوبۋستا قىسىلىسپايدى. بۇل جۇمىستى ءبىز جۇرگىزىپ جاتىرمىز» ، - دەيدى بەكمىرزا يگەنبەردينوۆ.

باسقارما باسشىسىنىڭ ايتۋىنشا، قالا ىشىندە قوسىمشا ەكسپرەسس اۆتوبۋستار ەنگىزىلىپ، 10 جانە 12- اۆتوبۋستارعا تۇسەتىن جۇك از دا بولسىن جەڭىلدەتىلگەن.

«بۇل باعىتتا جۇمىس جالعاسىن تاۋىپ جاتىر. بيىل سونىمەن بىرگە، جالپى اۆتوبۋس پاركتەرىن جاڭارتۋ كوزدەلۋدە. كۇن سايىن اۆتوبۋس پاركتەرىنىڭ جەتەكشىلەرىمەن وسى جۇمىس جۇزەگە اسىرىلىپ جاتىر. وتكەن جىلى 380 جاڭا اۆتوبۋس الدىق. ال بيىل تاعى قانشا الۋعا بولاتىنى تۋرالى بيۋدجەتتى ەسەپتەپ جاتىرمىز. قارجى قالالىق نەمەسە رەسپۋبليكالىق بيۋدجەتتەن الىنۋى مۇمكىن. قانداي مولشەردەگى قاراجات تۋرالى ءسوز قوزعالىپ وتىرعانىنان كوكتەمگە جۋىق حاباردار ەتەمىز. شىنىن ايتقاندا، كەلەسى كەزەڭدە «گارموشكالارعا» باسا ماڭىز بەرۋ جوسپارلانعان» ، - دەيدى بەكمىرزا يگەنبەردينوۆ.