ادامدارعا شاپقان اش قاسقىردى اتىپ ءولتىردى

استانا. قازاقپارات - بەلارۋستەگى براگينسك اۋدانىندا ادامدارعا شاپقان ۇرعاشى قاسقىر اتىپ ءولتىرىلدى. بۇل تۋرالى بەلتا تىلشىسىنە جەرگىلىكتى اڭشىلىق ۇيىمنىڭ مۇشەسى رومان گەلەزنيك ايتقان.

«5-6- قاڭتار كۇندەرى اڭشىلار توبى تۇندە كورۋ قۇرىلعىسىمەن قاسقىردىڭ ىزىنە ءتۇستى. ءتۇز تاعىسىنان زارداپ شەككەندەر ونىڭ وتە ءىرى ەكەندىگىن ايتقان بولاتىن. ءبىز جالعىز جورتقان ۇرعاشى قاسقىردى اتىپ ولتىردىك»، - دەدى ول.

كومارين كەنتىندە اتالعان قاسقىر 2- قاڭتار كۇنى ەر ادامعا شابۋىل جاساپ، ونىڭ قولىن جارالاپ كەتكەن.

ەكىنشى وقيعا دا وسى ماڭايدا جانارماي قۇيۋ ستانتسياسىنىڭ جانىندا بولعان. ساۋدا دۇكەنىنە ۆەلوسيپەدپەن كەلگەن ادامعا توسىننان قاسقىر شاپقان. الگى ازامات جانتالاسا قارسىلاسقانىمەن جىرتقىش ونىڭ دا قولىن جارالاپ كەتكەن.

ءتۇز تاعىسىنان زارداپ شەككەندەرگە قاجەتتى مەديتسينالىق كومەك كورسەتىلىپ، قۇتىرماعا قارسى ارنايى ەكپە ەگىلدى.