بۇگىن «مەنىڭ قازاقستانىم» ءانۇران بولىپ بەكىتىلگەن
«مەنىڭ قازاقستانىم» ءانى رەتىندە تانىمال بولعان قازاقستاننىڭ ءانۇرانى پرەزيدەنت نۇرسۇلتان نازاربايەۆتىڭ باستاماسى بويىنشا 2006 -جىلى 6 - قاڭتاردا ەلىمىزدىڭ پارلامەنتىندە بەكىتىلدى. ال ءبىر كۇننەن كەيىن ەلباسى «قازاقستان رەسپۋبليكاسىنىڭ مەملەكەتتىك نىشاندارى تۋرالى» كونستيتۋتسيالىق زاڭ كۇشى بار جارلىعىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭعا قول قويدى. اتالعان زاڭمەن ءسوزىن جۇمەكەن ناجىمەدەنوۆ پەن نۇرسۇلتان نازاربايەۆ، مۋزىكالىق رەداكتسياسىن ءشامشى قالداياقوۆ جازعان «مەنىڭ قازاقستانىم» ءانى قازاقستان رەسپۋبليكاسىنىڭ جاڭا مەملەكەتتىك ءانۇرانى بولىپ بەكىتىلدى. ءبىرىنشى رەت ول 2006 -جىلى 11 - قاڭتاردا مەملەكەت باسشىسىنىڭ سالتاناتتى ۇلىقتاۋ راسىمىندە ورىندالدى.
ايتا كەتەرلىگى، بۇل ءاندى ءشامشى قالداياقوۆ 1956 -جىلى جۇمەكەن ناجىمەدەنوۆتىڭ سوزىنە جازعان بولاتىن. قازاقستان پرەزيدەنتى نۇرسۇلتان نازاربايەۆ انگە مەملەكەتتىك ءانۇران جوعارى مارتەبەسىن بەرۋ جانە اناعۇرلىم سالتاناتتى شىرقالۋى ءۇشىن مۋزىكالىق تۋىندىنىڭ باستاپقى ءماتىنىن وڭدەدى.
جالپى، تاۋەلسىز قازاقستاننىڭ تاريحىندا ەلىمىزدىڭ مەملەكەتتىك ءانۇرانى ەكى رەت - 1992 جانە 2006 -جىلدارى بەكىتىلدى. رەسپۋبليكا مەملەكەتتىك ەگەمەندىگىن يەلەنگەننەن كەيىن، 1992 -جىلى قازاقستان ءانۇرانىنىڭ مۋزىكاسى مەن ماتىنىنە بايقاۋ جاريالاندى. بايقاۋ قورىتىندىسى بويىنشا قازاق ك س ر ءانۇرانىنىڭ مۋزىكالىق رەداكتسياسىن ساقتاۋ تۋرالى شەشىم قابىلداندى. وسىلايشا تاۋەلسىز قازاقستاننىڭ العاشقى ءانۇرانىنىڭ مۋزىكاسىنىڭ اۆتورلارى مۇقان تولەبايەۆ، ەۆگەني برۋسيلوۆسكي جانە لاتيف حاميدي بولدى. سونىمەن قاتار، ۇزدىك ماتىنگە جاريالانعان بايقاۋدا اۆتورلار ۇجىمى، بەلگىلى اقىندار مۇزافار الىمبايەۆ، قادىر مىرزاليەۆ، تۇمانباي مولداعاليەۆ جانە جادىرا دارىبايەۆا جەڭىپ شىقتى.
ءانۇران - مەملەكەتتىڭ باستى رامىزدەرىنىڭ ءبىرى. گرەكتىڭ «gimneo» سوزىنەن شىققان «گيمن» تەرمينى «سالتاناتتى ءان» دەگەن ماعىنانى بىلدىرەدى. ءانۇران ەل ازاماتتارىن ءتيىمدى الەۋمەتتىك- ساياسي تۇرعىدان توپتاستىرىپ، ەتنومادەني تۇرعىدان تەڭدەستىرۋ ءۇشىن نەگىزگى مانگە يە، ماڭىزدى دىبىستىق ءرامىز سانالادى.
