التايدا «قاسقىر ىزدەۋ كۇندەگىلى» اتتى فەستيۆال باستالدى - شەتەلدەگى قازاق ءتىلدى باق- قا شولۋ
***
موڭعولياداعى قازاق جاستارى جاڭا جىلعا جۇمسايتىن قارجىلارىن ساۋاپتى ىسكە ارنادى - ulgiinews.mn
موڭعولياداعى قانداستارىمىز قونىستانعان بايان- ولگەي ايماعىنىڭ دەموكراتيالىق جاستار وداعى جاڭا جىل مەرەكەسىن تويلاۋدان باس تارتىپ، مەرەكەنى اتاپ وتۋگە جوسپارلانعان قاراجاتقا تۇرمىسى تومەن وتباسىلارعا كومەك كورسەتتى. بۇل تۋرالى ulgiinews.mn سايتى جازادى.
اتاپ ايتقاندا، جاستار جاعدايى تومەن 13 وتباسىن تاڭداپ الىپ، ءار وتباسىنا 1 توننادان بارلىعى 13 توننا كومىر تاراتىپ، بالالارعا سىيلىق ۇلەستىردى. بۇل سوڭعى كەزدەرى اياز قىسىپ، قالجىراتا باستاعان كەمباعال جاندارعا ۇلكەن كومەك بولىپ، جۇرەكتەرىنە جىلۋ ۇيالاتتى. سونىمەن بىرگە جاستار ورتالىق اۋرۋحانانىڭ بالالار بولىمىندە ەمدەلىپ جاتقان 30 ءبۇلدىرشىننىڭ كوڭىلىن سۇراپ، ولارعا دا سىيلىق ۇسىندى.
«بۇل شارالاردىڭ باستى ماقساتى - ساياسي جانە بەيرەسمي ۇيىمداردىڭ نازارىن قوعامداعى نازىك توپتارعا قاراي بۇرۋ» - دەيدى ايماقتىق دەموكراتيالىق جاستار وداعىنىڭ ءتوراعاسى ەرقانات شىناربەك ۇلى.
***
التايدا «قاسقىر ىزدەۋ كۇندەلىگى» اتتى حالىقارالىق قار فەستيۆالى باستالدى - «حالىق گازەتى»
شىنجاڭنىڭ التاي ايماعىندا 26 ءتۇرلى قىسقى ساياحات قيمىلى باستالدى. بۇل تۋرالى قىتايدىڭ «حالىق گازەتى» باسىلىمى جازادى.
التايدىڭ قاناس قارلى القابىنداعى « قاسقىر ىزدەۋ كۇندەلىگى» فەستيۆالىندە، قوناقتارعا ارناپ قارداعى ارتىستىك ونەر، اتتراكتسيوندار، كونە تەرىمەن شاڭعى جارىسى، شاڭعىمەن اڭ اۋلاۋ، سنوۋموبيلدەرمەن جارىس، سلالوم، قار شاشۋ كارناۆالدارى سياقتى شوۋلاردان قۇرالعان 26 ءتۇرلى مەرەكەلىك باعدارلاما ازىرلەنگەن.
اتالمىش حالىقارالىق قار فەستيۆالى 2018 -جىلعى قاڭتاردان اقپان ايىنا دەيىن جالعاسپاق. سونىمەن بىرگە ات بايگە، ساداق اتۋ جانە بالۋاندار سايىسى سەكىلدى ۇلتتىق سپورت ويىندارىمىز دا وتەتىندىگى ايتىلعان.
***
ۇرىمجىدە جالعىز ادامعا ارنالعان «كاپسۋلا قوناق ءۇي» پايدا بولدى - «جەنمين جيباو» (People Daily)
قىتايداعى ءۇرىمجى حالىقارالىق اۋەجايىندا ەرەكشە ۇلگىدەگى «كاپسۋلا قوناق ءۇي» پايدالانۋعا بەرىلدى. بۇل تۋرالى People Daily سايتى حابارلادى.
«كاپسۋلا قوناق ءۇي» ءۇرىمجى حالىقارالىق اۋەجايىنىڭ ءۇشىنشى تەرمينالى ىشىندە ورنالاسقان. وندا جالپى 52 دەمالىس بولمەسى بار. ءبىر قىزىعى، بولمەنىڭ ىشكى ديامەترى 2 مەتر، بيىكتىگى 1.1 مەتر عانا. ال وسى شاعىن بولمە ىشىنە تەلەديدار، WiFi ورناتىلعان. جولاۋشىلار قوناق ۇيگە تەلەفون ارقىلى الدىن الا تاپسىرىس تا بەرە الادى.
سوڭعى جىلدارى جىبەك جولىنداعى ماڭىزدى قالا رەتىندە ۇرىمجىگە كەلىپ- كەتۋشىلەردىڭ سانى كۇرت ارتىپ وتىر. تەك وتكەن جىلى عانا ءۇرىمجى حالىقارالىق اۋەجايى 21 ميلليونعا جۋىق جولاۋشىنى قابىلداعان.
****
تۇرىك كاۋابى عارىشقا جولداندى - TRT
«شۆەيتسارياداعى «ايۆەردي» اتتى تۇرىك مەيرامحاناسى قىزىقتى جوبانى جۇزەگە اسىردى» ، دەپ جازادى تۇرىك تەلەراديو كومپانياسى.
كاۋاپتى شارعا بايلاعان مەيرامحانا كومانداسى ونىمدەرىن ستراتوسفەرا قاباتىنا جەتكىزدى.
وسى ەلدىڭ باسپا سوزىنە مالىمدەمە جاساعان مەيرامحانا باسشىلارى بۇل سالادا ءبىرىنشى رەت وسىنداي جوبا ۇيىمداستىرعانىن ايتىپ، گيننەستىڭ رەكوردتار كىتابىنا ءوتىنىش بەرگەندەرىن جەتكىزگەن.
گيننەستىڭ رەكوردتار كىتابى وكىلدەرىنەن تەڭىز دەڭگەيىنەن 37 مىڭ 795 مەتر بيىكتىككە كوتەرىلگەن كاۋاپقا قاتىستى ازىرگە جاۋاپ كەلمەدى.
***
يران - قىتاي ساۋدا باعىتىنداعى جىبەك جولىنىڭ بۋىنى - Fars اقپارات اگەنتتىگى
قىتاي- قازاقستان- تۇرىكمەنستان- يران تەمىر جولىنداعى تاسىمال تاريحي جىبەك جولى باعىتىنىڭ ترانزيتتىك جانە ساۋدا جوبالارىنا اينالۋدا. بۇل تۋرالى Fars اقپارات اگەنتتىگى جازادى.
يران، قازاقستان، قىتاي مەن تۇرىكمەنستان 2017 -جىلدىڭ سوڭىندا ءتورت ەل اراسىنداعى تەمىر جول قاتىناسى كولەمىن ارتتىرۋعا كەلىستى. ايماقتىڭ گەوگرافياسىندا ورتالىق ازيا مەن كاۆكاز ەلدەرىنىڭ حالىقارالىق سۋلارعا شىعۋى وتە ماڭىزدى. ساۋدا تۇرعىسىنان يران، قازاقستان، قىتاي مەن تۇرىكمەنستان تەمىر جولى بۇكىل ايماقتىڭ ساۋدا ىنتىماقتاستىعىنا وڭ اسەرىن تيگىزەدى.
«جىبەك جولى پويىزى» دەپ اتالعان يران، قازاقستان، قىتاي مەن تۇرىكمەنستاننىڭ ءبىرىنشى جۇك تاسىمالدايتىن پويىزى ەكى جىل بۇرىن 2016 -جىلدىڭ باسىندا قىتايدان شىعىپ، 10339 كيلومەتر جولدى ءوتىپ، 12 كۇننەن كەيىن تەھرانعا جەتكەن بولاتىن.
«كەلەسى پويىز 2017 -جىلى 29 - جەلتوقساندا جولعا شىعىپ، قازاقستاننىڭ «بولاشاق» تەمىر جول جەلىسى جانە تۇرىكمەنستان ارقىلى تەھرانعا كەلە جاتىر. چانشا- تەھران تەمىر جولى قازاقستان مەن تۇرىكمەنستاننان وتەدى. ونىڭ ۇزىندىعى - 10297 كيلومەتر. ەكسپەريمەنتتىك پويىز 14 كۇندە دىتتەگەن جەرىنە جەتەدى. بۇل تەڭىز ارقىلى تاسىمالداۋمەن سالىستىرعاندا ۋاقىت تۇرعىسىنان ەڭ قىسقا جول بولادى. 2014 -جىلى يران- تۇرىكمەنستان- قازاقستان تەمىر جولىن ىسكە قوسۋ ارقىلى الەمنىڭ شىعىسى (قىتايدان ورتالىق ازياعا دەيىن) مەن باتىسىن (باتىس ەۋروپا ەلدەرى) قوساتىن قۇرلىق جولىنىڭ ۇزىندىعى شامامەن 10000 كيلومەترگە قىسقاردى. يراننىڭ ۇلكەن ەكونوميكالىق نارىعى مەن ومان تەڭىزى جانە پارسى شىعاناعى سۋلارىنا شىعۋ مۇمكىندىگى يراننىڭ ايماقتاعى نەگىزگى ترانزيت ورتالىعىنا اينالۋىنا جاقسى جاعداي تۋدىرادى» ، دەپ جازادى دەرەككوز.
***
قىتاي عالىمدارى 1.1 سەكۋندتا قۋاتتالاتىن ەرەكشە باتارەيا ويلاپ تاپتى - «جەنمين جيباو» (People Daily)
قىتايدىڭ جىجياڭ ۋنيۆەرسيتەتىنىڭ عالىمدارى 1.1 سەكۋندتا قۋاتتالاتىن، سۋىق پەن ىستىققا ءتوزىمدى جاڭا تيپتەگى اليۋميني ــ گرافەن باتارەياسىن ويلاپ تاپتى. بۇل تۋرالى «جەنمين جيباو» سايتى حابارلادى.
اتالعان باتارەيا ىستىققا دا، سۋىققا دا شىدامدى ءارى بۇكتەۋگە بولاتىن يكەمدىلىگىمەن ەرەكشەلەنۋدە.
ونىڭ ءبىر بەتى گرافەن جۇقا قابىرشاقتى، ەكىنشى بەتى ءتۇستى مەتالل. ەكى دانا باتارەيانى ءبىر بىرىنە جالعاساڭىز LED شىراعىن جاندىرماق. ال قۋاتتاۋ سىيىمدىلىعى - 120mAh/g. 250 مىڭ رەت توقتاۋسىز جۇمىس ىستەگەننەن كەيىن دە قوسىمشا 91 پايىز قۋات كۇشى قالاتىنى انىقتالعان. سونىمەن قاتار، بۇل باتارەيانى - 40 گرادۋس سۋىقتىقتان 120 گرادۋس ىستىققا دەيىن قولدانۋعا بولادى.
***
قىتايدا مۇز ويما شەبەرلەرىنىڭ سايىسى ءوتتى - تيان- شان پورتالى
قىتايدىڭ سولتۇستىك شىعىسىنداعى حاربين قالاسىدا 7- مەملەكەتتىك مۇز فەستيۆالى ءوتتى، دەپ حابارلايدى تيان- شان پورتالى.
5 كۇنگە جالعاسقان سايىسقا قىتايدىڭ ءار ايماعىنان 14 كوماندا باق سىنادى. شەبەرلەر ونەرىن سالىپ، اتالعان جارىسقا وزدەرىنىڭ كەرەمەت تۋىندىلارىن ۇسىندى.
ا
ۆتور: ريزابەك نۇسىپبەك ۇلى
