كوكشەتاۋدا مەردىگەر ءبىر پاتەردى ەكى ادامعا ساتقان

استانا. قازاقپارات - كوكشەتاۋدا مەردىگەر «كان-سام» ج ش س ۇلەسكەرلەردىڭ پاتەرلەرىن وزگە ادامدارعا ساتىپ جىبەرگەن، دەپ حابارلايدى قازاقپارات.

اقمولا وبلىسى اكىمىنىڭ ورىنباسارى ۆاسيلي كرىلوۆتىڭ توراعالىعىمەن وتكەن جيىندا كوكشەتاۋ قالاسى بويىنشا ۇلەسكەرلەردىڭ ماسەلەلەرى قارالدى.

وتىرىس بارىسىندا «كان-سام» ج ش س «تۇرعىن ءۇي قۇرىلىسىنا ۇلەستىك قاتىسۋ تۋرالى» ق ر زاڭىن بۇزعانى تۋرالى مەملەكەتتىك ساۋلەت- قۇرىلىس باقىلاۋ باسقارماسىنىڭ باسشىسى نۇرجان مۇقانوۆ، اقمولا وبلىسى بويىنشا ءى ءى د تەرگەۋ باسقارماسىنىڭ تەرگەۋشىسى ايبەك قاليقۇلوۆ، كوكشەتاۋ قالاسى پروكۋرورىنىڭ ورىنباسارى تالعات وسپانوۆ جانە كوكشەتاۋ قالاسى اكىمىنىڭ ورىنباسارى يۆان يۋرچەنكونىڭ باياندامالارى تىڭدالدى.

وسى ورايدا، ايماق باسشىسىنىڭ ورىنباسارى ۆاسيلي كرىلوۆ قالا اكىمدىگىنىڭ جاڭادان سالىنىپ جاتقان نىساندارعا مونيتورينگ جۇرگىزۋدەگى جۇمىستارىن سىنعا الىپ، سوتتىق- قۇرىلىس ساراپتاما جۇمىستارىن جۇرگىزۋ ءۇشىن قارجى تابۋدى تاپسىردى.

«ءبىز بۇل پروبلەمانى سوڭىنا دەيىن شەشۋ ءۇشىن قۇقىق قورعاۋ ورگاندارىمەن بىرلەسە وتىرىپ، شەشۋ الگوريتمىن تاڭداۋىمىز كەرەك. ۆەدومستۆوارالىق كوميسسياسى جۇمىسى ودان جالعاسا بەرەدى»، - دەپ قورىتىندىلادى ۆاسيلي كرىلوۆ.

ەسكە سالا كەتەيىك، 2015 -جىلدىڭ باسىندا مەردىگەر «كان- سام» ج ش س مەن قالا تۇرعىندارى اراسىندا ساتپايەۆ كوشەسىنىڭ بويىندا سالىنىپ جاتقان 18 پاتەرلى تۇرعىن ۇيدەن پاتەر ساتىپ الۋ تۋرالى جازباشا كەلىسىمشارت جاسالعان بولاتىن.

سول كەزدە مەردىگەر ۇلەسكەرلەرگە 2015 -جىلدىڭ سوڭىنا دەيىن قۇرىلىس جۇمىستارىن اياقتايتىنىن ايتىپ سەندىرگەن بولاتىن. وسىعان وراي، ۇلەسكەرلەردىڭ باسىم بولىگى 100 پايىز اقشالارىن الدىن الا تولەدى.

الايدا، ج ش س كەلىسىمشارتتاعى مەرزىمى بۇزىپ، نىسان وسى كۇنگە دەيىن پايدالانۋعا بەرىلگەن جوق. كەيىن بەلگىلى بولعانداي تۇرعىن ءۇيدىڭ قۇرىلىسى مەملەكەتتىك ساۋلەت- قۇرىلىس باقىلاۋدىڭ رۇقساتىنسىز وزگە ادامنىڭ مەنشىگىندەگى جەر تەلىمىندە جوبالىق- سمەتالىق قۇجاتتارىنسىز جۇرگىزىلگەن.

وعان قوسا، مەردىگەردىڭ اقشاسى تولەنگەن پاتەرلەردى وزگە ادامدارعا قايتا ساتقانى انىقتالدى. ناتيجەسىندە 15 پاتەرگە (3 پاتەر جەر تەلىمىنىڭ يەسىنە بەرىلۋى ءتيىس) 22 وتباسى ۇمىتكەر بولىپ وتىر.

قازىرگى كەزدە، ءبىرقاتار ۇلەسكەرلەردىڭ قولدارىندا تولەگەن اقشالارىن قايتارىپ الۋى تۋرالى سوت شەشىمى دە بار. ءبىراق تا مەردىگەر سوتتىڭ بۇل شەشىمىن ورىنداۋعا اسىعار ەمەس.