وتكەن جىلى ەل اۋزىنان تۇسپەگەن تۇلعالار
قازاقپارات ءتىلشىسى بىلتىر كوپشىلىك تالقىسىنا كوبىرەك تۇسكەن تۇلعالاردىڭ ءتىزىمىن جاسادى.
سونىمەن 2017 -جىلى ەل اۋزىنان تۇسپەگەن كىمدەر؟
جىل جۇلدىزى
2017 -جىلى قازاقستانداعى جارىق جۇلدىزداردىڭ ءبىرى - ديماش قۇدايبەرگەننىڭ ەسىمى جەر جاھانعا تانىلدى.
ديماش كۇللى الەمگە قىتايداعى «I am Singer» جوباسىن ارقىلى ايگىلى بولدى.
قىتايلىقتار «ءتاڭىر نازارىنا العان ءانشى» اتاعان ديماشتىڭ داۋىس دياپازونىنا الەمنىڭ تۇكپىر- تۇكپىرىنەن بەلگىلى انشىلەر مەن ونەرسۇيەر قاۋىم تاڭ قالىستى.
ولاردىڭ اراسىندا لارا فابيان، دجەكي چان تاعى باسقا ونەرپازدار بار.
قىتاي ب ا ق- تارىندا «ديماش فەنومەنى» دەگەن تەرمين پايدا بولدى. ول ەكى ەل اراسىنداعى مادەني قاقپانى اشتى دەپ جارىسىپ جازدى قىتايلىق باسپا ءسوز.
ديماش قۇدايبەرگەن نيۋ- يوركتەگى تايمس سكۆەردىڭ ەڭ ۇلكەن باستى لەد ديسپلەيىندە كورسەتىلگەنىن بۇعان دەيىن حابارلاعانبىز. الەمدى تالانتىمەن ءتانتى ەتكەن قازاقستاندىق ءانشى امەريكا جۇرتشىلىعىنا دا تانىستىرىلدى.
ديماش Global Shopping Festival-دا الەمدىك جۇلدىزدارمەن بىرگە قىزىل كىلەم ۇستىمەن ءجۇرىپ ءوتتى
2017 Fresh Asia music Festival فەستيۆالىندە ديماش قۇدايبەرگەن «ەڭ ۇزدىك شەتەلدىك ونەر تۇلعاسى» اتاعىن جەڭىپ الدى.
جىل ءانشىسى
جىل سوڭىندا 10 جاستاعى جارىق جۇلدىز دانەليا تولەشوۆا قازاقستاندىقتاردىڭ عانا ەمەس، بۇكىل الەم نازارىنا ءىلىندى. جاس ءانشى ۋكراينادا وتكەن «گولوس. ءدىتي» شوۋىندا باس جۇلدەنى جەڭىپ الدى.
العاشقى كەزەڭدە ول «Stone Cold» ءانىن ورىنداپ، بارلىق قازىلار القاسىن ءتانتى ەتتى. دانەليانىڭ ءانىن Youtube جەلىسىندە 8 ملن- نان استام ادام كورگەن.
جاس ونەرپازدىڭ اناسى ق ر مادەنيەت جانە سپورت مينيسترىمەن كەزدەسۋ بارىسىندا بالالارعا ارنالعان «Junior Eurovision» بايقاۋىنا قاتىسۋ جوسپاردا بار ەكەندىگىن ايتتى.
جىل زيالىسى
قازاقستاندىقتار تەك قانا ونەر سالاسىندا عانا جاسىنداي جارقىلداعان جوق. بيىل ەلىمىزدە تۇڭعىش رەت 12 جاستاعى بالا مەكتەپتى ەكستەرن ءبىتىردى.
ابزال مىرزاشتىڭ ەسىمى سوڭعى قوڭىراۋدان سوڭ جالپاق جۇرتقا جايىلدى.
«ۆۋندەركيند» بالا 3 جاسىنا جەتپەي- اق، ارىپتەردى قوسىپ وقي باستاعان. ال 4 جاسىندا ەكى تاڭبالى سانداردى كوبەيتۋدى مەڭگەرگەن. ەرەكشە قابىلەتىنىڭ ارقاسىندا ول 3، 5، 7، 9، 11-سىنىپتاردى عانا وقىپ، نەبارى 7 جىلدا، 12 جاسىندا مەكتەپ تۇلەگى اتاندى.
ۇ ب ت- دان 117 بالل جيناعان ابزال IELTS سىناعىنان دا سەرتيفيكاتقا قول جەتكىزگەن. مەملەكەتتىك گرانتى بار ەڭ جاس تالاپكەرگە ەلىمىزدىڭ 4 ج و و- سى تالاسقان. زەرەك وقۋشى ماسساچۋسەتس تەحنولوگيالىق ۋنيۆەرسيتەتىنە تۇسۋگە ىنتا بىلدىرگەن ەكەن. شەتەلدىك ۋنيۆەرسيتەت بالانى قابىلداۋعا دا ءازىر بولعان. الايدا، 14 جاسقا دەيىنگى تالاپكەرلەرگە امەريكاعا وتباسىمەن بىرگە كوشۋ كەرەك دەگەن شارت بولعاندىقتان، ابزالدىڭ تۋعان- تۋىستارى بۇل جوسپاردى كەيىنگە قالدىرعان. ءتورت وقۋ ورنىنىڭ ىشىندە ابزالدىڭ تاڭداۋى قازاق- بريتان ۋنيۆەرسيتەتىنە ءتۇستى.
جىل پاتريوتى
ق ر مەملەكەتتىك حاتشىسى گۇلشارا ءابدىقالىقوۆا الماتىلىق وقۋشى داۆيد بالتابايەۆتى «پاتريوتتىقتىڭ ۇلگىسى» دەپ اتادى.
10 جاستاعى وقۋشى اۋلانى قوقىستان ءوز كۇشىمەن تازارتتى. بوستاندىق اۋدانى قازاق فيلم شاعىن اۋدانىندا ورنالاسقان تۇرعىن ءۇيدىڭ ماڭى كۇل- قوقىسقا تولىپ قالعان. جوعارى قاباتتا تۇراتىن تۇرعىندار قوقىستارىن ارنايى ورىنعا اپارماي، تەرەزەدەن لاقتىرا بەرگەن.
3-سىنىپ وقۋشىسى داۆيد بالتابايەۆتىڭ مۇنداي يگى ءىس ىستەۋىنە اكەسى ەلدار الىمبايەۆ مۇرىندىق بولعان. «اينالاداعى قوقىستان جاعىمسىز يىستەر شىعا باستادى، ەگەۋقۇيرىقتار قاپتاي باستادى. اۋلا تازالانباعانىنا شامامەن 2 اپتاداي بولدى. بالام قوقىستاردى ارباعا تيەپ، 200 مەتر جەردەگى قوقىس جاشىگىنە 2-3 رەت تاسىدى. قالعانىنا مەن كومەكتەستىم. الەۋمەتتىك جەلىگە سالعانداعى ويىم وسىنداي كىشكەنتاي مىسالدار ارقىلى باسقالارعا دا ۇلگى بولساق دەگەن نيەت بولدى»، - دەدى ەلدار الىمبايەۆ.
اكەلى- بالالى الماتىلىقتار الەۋمەتتىك جەلىدە #چيستاياالماتا حەشتەگىن قۇردى. ولار قالانىڭ تازالىعىنا نەمقۇرايدى قاراماۋعا شاقىرادى.
جاس وقۋشى «رۋحاني جاڭعىرۋ» باعدارلاماسى اياسىندا «الماتى قالاسىنىڭ بەلسەندى ازاماتى» اتاعىن جەڭىپ الدى.
جىل ينستاگرامشىسى
سوڭعى كەزدە الەۋمەتتىك جەلىدە «اتى شىقپاعان سوڭ، جەر ورتەپ جۇرگەن» تۇلعالاردىڭ تانىمالدىلىعى ارتىپ بارادى. سول سياقتى كوپشىلىكتىڭ تالقىسىنا ءتۇسىپ جۇرگەن ادامداردىڭ ءبىرى - ايجان بايزاقوۆا. ينستاگرامنىڭ «جۇلدىزى»، 22 جاستاعى بلوگەر ايجان بايزاقوۆا انايى جازبالارىمەن، جالاڭاش سۋرەتتەرىمەن تانىمال بولدى.
تاەكۆاندودان قازاقستان چەمپيونى، قارا بەلبەۋ يەگەرى جاريالاعان سوڭعى ۆيدەوسى ءۇشىن ءىستى بولدى.
بەينەكادردا بايزاقوۆانىڭ بارىندا جاس قىزدار 50 مىڭ تەڭگە ءۇشىن تىر جالاڭاش شەشىنگەن. كەيىن قازاقستاندىق بەلگىلى تۇلعالار، ەر-ازاماتتار بۇل ۇياتسىزدىققا قاتىستى ۆيدەوۇندەۋ جاريالادى.
بۇل ارەكەتى ءۇشىن بەلگىلى بلوگەر بايزاقوۆا 3 تاۋلىككە قامالدى.
تاكاپپارلىقتىڭ ەتالونى
سونىمەن قاتار، سوڭعى كەزدە ۇلكەننىڭ دە، كىشىنىڭ دە تىلگە تيەك ەتكەن تاقىرىبى - ءانشى تورەعاليدىڭ پاۆلودارداعى كونسەرتىندە كورسەتكەن قىلىعى بولدى.
ءانشىنىڭ تىڭدارمانىنا زەكىگەن ۆيدەوسى Youtube جەلىسىندە 230 مىڭ رەت قارالعان. بۇل ۆيدەو جاريالانىسىمەن تورەعالي تاقىرىبى جەلىدەگىلەر اراسىندا كوكپارشا تارتىلدى.
الەۋمەتتىك جەلىدە قولدانۋشىلاردىڭ ءبىر بولىگى تورەعاليدىڭ قىلىعى مەن كەشىرىم سۇراۋىن سىناپ جازسا، وزگەلەرى ەل ەركەسىن اقتاپ جاتىر.
ق ر مادەنيەت جانە سپورت ءمينيسترى ارىستانبەك مۇحامەدي ۇلى تورەعاليدىڭ ارەكەتىن كورەرمەندى قۇرمەتتەمەۋ دەپ باعالايتىندىعىن ايتقان بولاتىن.
سونىمەن قاتار، ءانشىنىڭ اكەسى دە تالدىقورعانداعى كونسەرتىندە تىلشىلەردى بالاعاتتاپ، دورەكى مىنەز كورسەتكەن بولاتىن.
جىل ايتقىشى
كوپشىلىكتىڭ تالقىلاۋىنان تۇسپەگەن تۇلعالاردىڭ ءبىرى - باۋىرجان بايبەك. قالا اكىمىنىڭ 500 تەڭگەگە تۇسكى اس ىشۋگە بولادى دەگەن ءسوزى جەلىدە كەڭىنەن تالقىلانىپ، ارتى مەمدەرگە ۇلاستى.
قالىڭ كوپشىلىك، جۋرناليستەر، بلوگەرلەر بايبەكتىڭ سوزىنەن كەيىن 500 تەڭگەدەن تۇسكى اس ىشۋگە بولاتىن مەيرامحانالاردى ىزدەپ، ارالاپ كەتتى.
كەيبىر تاماقتانۋ ورىندارى «بايبەكتەن كەلگەندەرگە» ارنايى اكسيا ۇيىمداستىردى.
ءوتىپ بارا جاتقان 2017 -جىلدا ەل ەسىندە قالعان تۇلعالار وسى بولدى. كەلەر جىلى دا سپورت، ونەر، مادەنيەت سالاسىندا جارىق جۇلدىزدار جاناتىنىنا سەنەيىك.
