ا ق ش- تا تۇراتىن قازاق سكريپكاشىسى ونەر كورسەتتى

 استانا. قازاقپارات - «استانا وپەرا» كامەرالىق- سيمفونيالىق وركەسترى مەن سوليست وردابەك دۇيسەن (سكريپكا، ا ق ش) «ماڭگى وشپەس مۋزىكا» اتتى كونسەرت ۇسىنباق.

 28 - جەلتوقسان كۇنى تەاتردىڭ كامەرالىق زالىندا دارىندى سكريپكاشى ءىلياس دۇيسەن ديريجەر رەتىندە العاش رەت ونەر كورسەتتى.

بەلگىلى قازاقستاندىق سكريپكاشى وردابەك دۇيسەن - «داللاس وپەرا» (ا ق ش) سيمفونيالىق وركەسترىنىڭ كونتسەرتمەيستەرى، كوليما قالاسىنداعى (مەكسيكا) ونەر ۋنيۆەرسيتەتىنىڭ قۇرمەتتى ءارتىسى جانە شاقىرىلعان پروفەسسورى، فورت ۋورت قالاسىنداعى (ا ق ش) سيمفونيالىق وركەستردىڭ ءارتىسى، گراتستاعى (اۆستريا) AIMS فەستيۆالىنىڭ باس كونتسەرتمەيستەرى. مۋزىكانتتىڭ شىعارماشىلىعى كوپتەگەن ماراپاتتارمەن اتالىپ وتكەن، ول - رەسپۋبليكالىق جانە حالىقارالىق بايقاۋلاردىڭ لاۋرەاتى، «مادەنيەت سالاسىنىڭ ۇزدىگى» توسبەلگىسىنىڭ يەگەرى، «دارىن» مەملەكەتتىك جاستار سىيلىعىنىڭ لاۋرەاتى. پروفەسسورلار رايسا جانە ايمان مۇساقوجايەۆالاردىڭ سىنىبىندا قازاق ۇلتتىق مۋزىكا اكادەمياسىن، پروفەسسور ەدۋارد شميدەردىڭ سىنىبىندا تەحاس شتاتىنداعى (ا ق ش) داللاس ۋنيۆەرسيتەتىنىڭ اسپيرانتۋراسى مەن ماگيستراتۋراسىن تامامداعان. وردابەك دۇيسەن ەۋروپا، ازيا جانە امەريكا ەلدەرىندە ۇلكەن جەتىستىكپەن ونەر كورسەتتى.

وردابەك پەن ءىلياس دۇيسەن - مۋزىكالىق اۋلەتتى ابىرويمەن جالعاستىرىپ كەلەدى، ولاردىڭ اكەسى - كۇيشى- دومبىراشى، اناسى مەن اپاسى - پيانيستەر.

وسى كەشتە كورەرمەن نازارىنا اۆستريالىق كلاسسيكتەر يوزەف گايدن مەن ۆولفگانگ امادەي موتسارتتىڭ شىعارماشىلىعى ۇسىنىلدى. ۆ. ا. موتسارتتىڭ №29 سيمفونيا ليا ماجور (ك. 201) تۋىندىسى شىرقالادى. ءبىر قىزىعى، مۋزىكالىق تاقىرىپتارعا تولى ءارى اۋقىمى كەڭ، شىعارۋ تاسىلىنە قاراي كەرەمەت بولىپ تابىلاتىن بۇل شىعارمالاردى ۇلى كومپوزيتور ون جەتى جاسىندا شىعارعان ەكەن.

 -  وتانىمدا ونەر كورسەتۋ -  مەن ءۇشىن ۇلكەن مارتەبە، وسىنداي كەرەمەت مۇمكىندىكتى ۇسىنعان ءۇشىن تەاتر ديرەكتورى ع. ا. احمەدياروۆقا العىسىمدى بىلدىرەمىن. بۇل كونسەرتتىڭ مەن ءۇشىن تاعى ءبىر ەرەكشەلىگى -  تۋعان ىنىممەن بىرگە وينايتىن بولامىن، -  دەدى وردابەك دۇيسەن.

 

ەركىن قالدان

«ايقىن»