باتىردىڭ وسيەتى

 ول كىسىنىڭ ءومىر جولى، سۇراپىل سوعىس جىلدارىنداعى جانقيارلىق ەرلىگى، وجەتتىگى مەن ورلىگى، العىرلىعى مەن كورەگەندىگى -  بىلە بىلگەنگە ۇلى تاربيە، ۇلكەن ونەگە مەكتەبى. باتىر اتامىز -  الماس قىلىشتاي وتكىر دە قايسار، دانا دا ءدانىشپان، « ءسوز قادىرىن ءوز قادىرى، ءوز قادىرى ەل قادىرى» دەپ باعالاعان ايبىندى تۇلعا، سۋرەتكەر جازۋشى.

كورنەكتى جازۋشىنىڭ ورىس جانە قازاق تىلدەرىندە جازىپ قالدىرعان «ءبىر ءتۇننىڭ تاريحى» ، «ۇشقان ۇيا» سياقتى العاش شىققان كىتاپتارى مەن ودان كەيىن جازىلعان «ماسكەۋ ءۇشىن شايقاس» ، «جاۋىنگەردىڭ تۇلعاسى» ، «مايدان» سياقتى وزگە دە كوپتەگەن شىعارمالارى وقىرمان جۇرەگىنە جول تاۋىپ، كوپشىلىكتىڭ ىزدەپ وقيتىن كىتاپتارىنىڭ بىرىنە اينالدى. بۇل شىعارمالاردىڭ بارلىعى دا كوپتەگەن ەلدەردىڭ تىلدەرىنە اۋدارىلىپ باسىلدى. باتىردىڭ وسيەت سوزدەرىنىڭ كوبى ۇلى وتان سوعىسى كەزىندە ورىس تىلىندە جازىلدى. ويتكەنى ول ۇران بۇكىل سوۆەت ارمياسىنىڭ كومانديرلەرىنە ارنالعان. قازىرگى ۋاقىتتا بۇل وسيەتتەر ەكى تىلدە دە قولدانىسقا يە. باتىردىڭ ارتىنا قالدىرعان وسيەت سوزدەرىن وقي وتىرىپ، تاقىرىپ جاعىنان اۋقىمى كەڭ ەكەندىگىنە كوز جەتكىزەسىڭ. وسيەت سوزدەرىنىڭ ىشىندە كوبىرەك قالام تەربەگەنى - قولباسشىلىق، ساردارلىق، اسكەري بورىش جايىندا جازىلعان افوريزمدەرى. مەن، قۇرالاي ناقىسبەكوۆا - ءال- فارابي اتىنداعى قازاق ۇلتتىق ۋنيۆەرسيتەتى حيميا جانە حيميالىق تەحنولوگيا فاكۋلتەتىنىڭ 3 كۋرس ستۋدەنتىمىن. وسى ۋنيۆەرسيتەت قابىرعاسىندا وقىپ ءجۇرىپ، اسكەري كافەدراعا تاپسىردىم. باۋىرجان اتامنىڭ قاناتتى سوزدەرى اسكەري كافەدرانى تاڭداۋىما بىردەن- ءبىر سەبەپ بولدى. ول كىسىنىڭ ناقىلدارى سان الۋان تاقىرىپقا ارنالعان: سوعىس جانە بەيبىت ءومىر، ءتارتىپ پەن تاربيە، پارىز بەن قارىز، ءتىل مەن ادەبيەت، سالت پەن ءداستۇر، تاعى سول سياقتى بولىپ جالعاسا بەرەدى.

 «نامىستى نانعا ساتپا» ، «ەردىڭ تۋى - نامىس» ، «تىزە بۇگىپ ءتىرى جۇرگەننەن، تىكە تۇرىپ ولگەن ارتىق» ، «ۇشقىنسىز وت تۇتانباس» ، «ءوزىن سىيلاماعان باسقانى سىيلاۋعا قابىلەتسىز» ، «تارتىپكە باعىنعان قۇل بولمايدى، ءتارتىپسىز ەل بولمايدى» ، «ءتىل تازالىعى ءۇشىن كۇرەس ەشقاشان تولاستاماق ەمەس» جانە تاعى باسقا ماتەلدەرى جاستىڭ دا، كارىنىڭ دە ساناسىندا جاتتالعان ۇلاعاتتى سوزدەر. باتىر تەك ەۋروپالىق جانە رەسەيلىك اسكەري عىلىممەن، اسكەري ونەرگە سۇيەنبەيدى، ءوز اتا- بابالارىمىزدىڭ جاۋىنگەرلىك داستۇرلەرىنە ارقا تىرەيدى. «بىلەك ءبىردى جىعادى، اقىل- ايلا مىڭدى جىعادى» ، «ەر نامىسى -ەل نامىسى» ، «ەردى نامىس، قوياندى قامىس ولتىرەدى» سەكىلدى اتالارىمىزدىڭ ۇشقىر سوزدەرىن باۋىرجان مومىش ۇلى ورىندى پايدالانعان. سوندىقتان باتىردىڭ وسيەتتەرى قازاق جاۋىنگەرلەرىنە وتە جاقىن، ويلارىنا ازىق، بويلارىنا قۋات بەرىپ تۇرادى. اتامىزدىڭ داڭقى، رۋحى وزىنە ەمەس، ول بىزگە، ۇلتىمىزعا، كەلەر ۇرپاعىمىزعا كەرەك. باتىر بابامىزدىڭ داڭقىمەن، رۋحىمەن، دانا وسيەت سوزدەرىمەن تاربيەلەنگەن بىزدەر وسال ۇرپاق بولمايمىز دەپ سەنەمىن.

قۇرالاي ناقىسبەكوۆا،ءال- فارابي اتىنداعى قازۇۋ- دىڭ ستۋدەنتى

aikyn.kz