كەلەر جىلدان باستاپ زەينەتاقى جيناعىن بىردەن الۋعا كىمدەر قۇقىلى
دەپ جازادى Altaynews.
ءبىرىڭعاي جيناقتاۋشى زەينەتاقى قورىنان بەرىلەتىن زەينەتاقى تولەمدەرىن ەسەپتەۋ ءتارتىبى مەن ولاردى الۋ كەستەسى 2018 -جىلدىڭ 1 - قاڭتارىنان وزگەرىسكە ۇشىرايدى.
«ءبىرىڭعاي جيناقتاۋشى زەينەتاقى قورى» ا ق- نىڭ شىعىس قازاقستان وبلىسى بويىنشا فيليالى ديرەكتورىنىڭ ورىنباسارى قارلىعاش بايدىلدايەۆانىڭ سوزىنە قاراعاندا، بۇل وزگەرىستەر 2014 -جىلى ەلباسىنىڭ جارلىعىمەن بەكىتىلگەن، قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 -جىلعا دەيىنگى تۇجىرىمداماسىندا كورسەتىلگەن. تۇجىرىمدامانىڭ بۇل نورمالارى 2015 -جىلى ماقۇلدانعانىمەن، كۇشىنە 2018 -جىلدىڭ قاڭتارىنان باستاپ ەنەدى.
سونىمەن زەينەتكەر جەكە زەينەتاقى شوتىنداعى زەينەتاقى جيناقتارىنىڭ سوماسى ەڭ تومەن زەينەتاقىنىڭ 12 ەسەلەنگەن مولشەرىنەن اسپاعان جاعدايدا عانا جيناقتالعان قارجىسىن تولىق الا الادى. 2018 -جىلى بۇل سوما:
33745 x12 = 404940 تەڭگەنى قۇرايدى. بۇل سومادان ارتىق قاراجاتتىڭ بارلىعى تەك اي سايىن تولەنەدى.
«ۇكىمەت قاۋلىسىمەن بەكىتىلگەن، زەينەتاقى تولەمدەرىنىڭ مولشەرىن ەسەپتەۋدى جۇزەگە اسىرۋ ادىستەمەسىنە سايكەس، زەينەتاقى تولەمدەرىنىڭ جىلدىق سوماسىنىڭ ون ەكىدەن ءبىر بولىگى رەتىندە (12/1) ايقىندالادى. ادىستەمە بويىنشا زەينەتاقى جيناقتارىنىڭ سوماسى، الۋشىنىڭ ءتيىستى جاسىنداعى زەينەتاقى جيناقتارىنىڭ اعىمداعى قۇنىنىڭ كوەففيتسيەنتى ەسكەرىلەدى. زەينەتاقى جيناقتارىنىڭ اعىمداعى قۇنىنىڭ كوەففيسيەنتى دەگەنىمىز زەينەتاقى جيناقتارىنىڭ ينۆەستيتسيالىق باسقارۋدا بولعان مەرزىمىن ەسەپكە الا وتىرىپ، ولاردىڭ بولاشاقتاعى قۇنىن ەسكەرەتىن كورسەتكىش. زەينەتكەردىڭ قوردا جيناقتالعان سوماسى وسى كوەففيتسيەنتكە كوبەيتىلىپ، 12-گە بولىنەدى. ودان شىعاتىن سوما زەينەتاقى قورىنان جۇزەگە اسىرىلاتىن اي سايىنعى تولەم بولىپ تابىلادى. ءبىراق، اي سايىنعى زەينەتاقى تولەمدەرىنىڭ مولشەرى ءتيىستى قارجى جىلىنا بەلگىلەنگەن ەڭ تومەن كۇنكورىس دەڭگەيىنىڭ 54 پايىزىنان تومەن بولماۋى ءتيىس»، - دەيدى «ءبىرىڭعاي جيناقتاۋشى زەينەتاقى قورى» ا ق- نىڭ شىعىس قازاقستان وبلىسى بويىنشا فيليالى ديرەكتورىنىڭ ورىنباسارى قارلىعاش بايدىلدايەۆا.
جاڭا جىلدان باستاپ قورداعى جيناقتالعان سومانى بىردەن شەشىپ الۋ قۇقىعى تەك شەتەلگە تۇراقتى قونىس اۋدارعاندار مەن قايتىس بولعان زەينەتكەرلەردىڭ مۇراگەرلەرىنە عانا بەرىلەدى. ءتىپتى ءبىرىنشى جانە ەكىنشى توپتاعى مۇگەدەكتەر دە جيناعان قاراجاتتارىن بولشەكتەپ الاتىن بولادى.
شەتەلگە كەتكەندەرگە قاراجاتتارىن الۋ ءۇشىن ءوتىنىش جازىپ، قاجەتتى قۇجاتتاردى رەسىمدەۋ كەرەك. مۇراگەرلەرگە جارتى جىلدان كەيىن مۇراگەرلىك تۋرالى قۇجاتتاردىڭ نەگىزىندە جەكە شوتتاعى قارجىنى بىردەن شەشىپ الۋىنا بولادى.
