اينۇر تۇرسىنبايەۆا: ادام بىرەۋدى جامانداۋ ارقىلى تەك وشەدى
استانا. قازاقپارات - ايتىسكەر اقىن اينۇر تۇرسىنبايەۆا ادامدى وسىرەتىن جانە وشىرەتىن ادەتتى اتادى.
اقىننىڭ ايتۋىنشا وسەك تىڭداۋ نەمەسە ايتۋ ادامدى قۇرتادى ەكەن. بۇل ويىن الەۋمەتتىك جەلىدەگى پاراقشاسىنا جازعان.
«ادامنىڭ جولىن بايلايتىن، ەنەرگياسىن الىپ قوياتىن، دەڭگەيىن تومەندەتەتىن، اشۋلانشاقتىققا كوپ ۇرىندىراتىن نە ەكەنىن بىلەسىز بە؟ وسەك! وسەكتى تىڭداۋ نەمەسە ايتۋ! ادام كىتاپ وقىپ، ىزدەنىپ وسەتىن بولسا، وسەك ايتۋ ارقىلى، بىرەۋدى جامانداۋ ارقىلى تەك وشەدى. جۇرتتىڭ ءبارى جاپپاي اڭگىمە ايتىپ وتىرعاندا ءمان بەرمەۋ ەڭ قيىنى... سەنىڭ دە ءتىلىڭ قىشيدى، اڭگىمەگە ارالاسقىڭ كەلەدى. ءبىراق ۇيرەنىڭىز. جالپى ايەلدەردىڭ %90 باس قوسقاندا نەمەسە داستارحان باسىندا بىرەۋدى جامانداپ وتىرادى ەكەن... يۋتۋبتى اشىپ قاراساڭىزدار پسيحولوگتاردىڭ بارلىعى وسى پىكىردە..! مىسالى ءبىز كوبىنەسە پايداسىز تىرلىكپەن اينالىسىپ جاتامىز. دوستارمەن باس قوسىپ جۇگىرۋمەن اينالىسۋ، تەاترعا بارۋ، وقىعان كىتاپتاردى تالداۋ، ءتىل ۇيرەنۋ دەگەن سياقتى پايداسى تيەتىن دۇنيەلەرگە ەرىنەمىز... قىزىق ەمەس دەپ ويلايمىز... ءبىراق پايدالى ەكەنىنە ءبارىڭىز كەلىسەسىزدەر عوي؟ ءوزىڭىز وسەسىز، بيىكتەيسىز، ادەمى بولاسىز، بالالارىڭىزعا ونەگەڭىز كوبەيەدى ەمەس پە؟! ءبىر تاباق ەتتى ورتاعا قويىپ اڭگىمە ايتۋ ەڭ وڭايى، تيگىزەتىن زيانى بار-اۋ دەپ ويلانباي قالىپ جاتامىز... كەز كەلگەن ءسوزدىڭ وزىمىزگە قايتىپ ورالاتىنىن ەسكەرسەك كوپ نارسەنى تۇسىنەر ەدىك...
ەشقاشان جۇرتتىڭ تالقىسىنا ءوز پروبلەماڭىزدى سالماڭىز! ەشقاشان بىرگە اس ءىشىپ جۇرگەن ادامدى جامانداماڭىز. ەشقاشان تانىمايتىن ادامدى جامانداماڭىز! ەشقاشان ايدالاداعى ادامنان اقىل سۇراماڭىز ەشقاشان رۋحاني تومەن ادامنىڭ دەڭگەيىنە تۇسپەڭىز، جوعارىعا قول سوزىڭىز، قولىمنان كەلمەيدى دەمەڭىز. جۇرەگىڭىزدى تىڭداڭىز، جۇرەگىڭىزدى جۇمسارتىڭىز.
بۇگىنگى دوسىڭىز ەرتەڭ-اق دۇشپان بوپ شىعۋى ابدەن مۇمكىن، سىرىڭىزدى ەڭ كوپ ايتقان ادامىڭىز ەڭ قاۋىپتى ادام ەكەنىن ۇمىتپاڭىز، بارىڭىزگە ساتتىلىك تىلەيمىن!»
دەرەككوز: Reactor
