الماتىدا كورەي مادەنيەتىنىڭ كەشى ءوتتى
قازاق مەملەكەتتىك قىزدار پەداگوگيكالىق ۋنيۆەرسيتەتىندە كارىس مادەنيەتىنەن سىر شەرتەتىن كونسەرت ءوتتى. بۇل تۋرالى وقۋ ورنىنىڭ مەديا ورتالىعى حابارلادى.
«الماتى اۋەندەرى» كونسەرتتىك بىرلەستىگى مەن كورەي ۇلتتىق مادەنيەتىن ساقتاۋ قورىنىڭ ۇيىمداستىرۋىمەن ۇسىنىلعان كەش «كورەي ۇلتتىق مۋزىكاسىن قازاقستاندىقتارعا تانىستىرۋ» جوباسى اياسىندا ۇيىمداستىرىلىپ وتىر.
ماقسات - ءداستۇرلى حالىق ءان-بيلەرى مەن زاماناۋي ونەردى ناسيحاتتاۋ ارقىلى ەكى ەل اراسىنداعى ءوزارا ىنتىماقتاستىقتى نىعايتۋ.
وڭتۇستىك كورەيالىق «پيلبونگ» ءانسامبلى ءوز رەپەرتۋارىنداعى ۇلتتىق اندەر مەن بيلەردى ورىنداپ، ونەرلەرىن ورتاعا سالدى. شىعارماشىلىق توپتىڭ جەتەكشىسى، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى چان پەنگ سۋن ءانسامبلدىڭ شىعۋ تاريحىنا توقتالىپ، كورەرمەندەردىڭ ساۋالدارىنا جاۋاپ بەردى.
«ونەر ۇجىمىنىڭ ىرتەتاسى وسىدان 3 عاسىر بۇرىن قالىپتاسقان. باستاپقىدا ەگىن باسىنداعى شارۋالاردىڭ اندەرىن مۋزىكالىق اسپاپتارعا قوسىپ جۇرتشىلىققا تانىلعان. ۋاقىت وتە كەلە ۇلكەن ساحنالارعا شىعىپ، ونەرىن پاش ەتە ءبىلدى. قازاقستاندا جىل سايىن كورەيا ەلىنىڭ مادەنيەتىنىڭ قۇرمەتىنە ارنالعان اۋقىمدى مەرەكەلىك شارالار ءوتىپ تۇرادى. بۇگىنگى كەش تە سونىڭ جالعاسى ىسپەتتەس. قوس مەملەكەتتىڭ ونەرىن ساباقتاستىرعان مادەني شارا الداعى ۋاقىتتا دا داستۇرگە اينالاتىنىنا سەنىمدىمىز»، - دەدى چان پەنگ سۋن.
شارا سوڭىندا قىزدار ۋنيۆەرسيتەتىنىڭ ونەر جانە مادەنيەت فاكۋلتەتىنىڭ دەكانى گۇلنۇر ومىربايەۆا انسامبل مۇشەلەرىنە وقۋ ورنى ۇجىمىنىڭ اتىنان العىسىن ءبىلدىرىپ، سىي-سياپات كورسەتتى.
