الماتىداعى قوعامدىق ۇيىمدار لاتىن ءالىپبيىنىڭ بەكىتىلگەن نۇسقاسىن قولدادى

الماتى. قازاقپارات - الماتى قالاسىنىڭ قوعامدىق ۇيىمدارى قازاق ءالىپبيىنىڭ بەكىتىلگەن نۇسقاسىن تولىقتاي قولدايدى، دەپ حابارلايدى قازاقپارات ءتىلشىسى.

قازاقپارات ءتىلشىسىنىڭ ساۋالىنا ءبىرقاتار قوعامدىق ۇيىم جەتەكشىلەرى جاۋاپ بەردى.

«ەل-شەجىرە» قوعامدىق قورىنىڭ ءتوراعاسى داۋلەت ءاشىمحان:

«ق ر پرەزيدەنتى نۇرسۇلتان نازاربايەۆ قازاق ءتىلى ءالىپبيىن كيريليتسادان لاتىن گرافيكاسىنا كوشىرۋ تۋرالى جارلىققا قول قويدى. ءبىز لاتىن عارپىنە كوشكەننەن نە ۇتامىز؟

بىرىنشىدەن، لاتىن ءالىپبيى قازاقستان مەن دامىعان ەلدەردىڭ اراسىن جالعايتىن كوپىر ىسپەتتى. الەمدىك ينتەگراتسياعا ۇمتىلىپ جاتقان ەل بولعاندىقتان، ءالىپبيدى دە بىرىزدەندىرۋ بۇرىننان كۇن تارتىبىندە تۇرعان ماسەلە. ەندى سول ماسەلەنى ءىس جۇزىندە شەشۋگە كىرىستىك.

ەكىنشىدەن، تاريحي جازبا مۇرالارىمىزدى سۇزگىدەن وتكىزۋگە مۇمكىندىك تۋدى.

ۇشىنشىدەن، قازاقستاندىقتار لاتىن ءالىپبيىن قولدانۋعا پسيحولوگيالىق تۇرعىدان دايىن. ەلىمىز نارىقتىق ەكونوميكاعا كوشىپ، جاڭا ەلەكترونيكالىق قۇرىلعىلار ەنگەن كەزدەن-اق، جۇرت لاتىنشا جازۋدى بىرتىندەپ باستاپ كەتتى. ادامدارعا لاتىن عارپىن ەشكىم ۇيرەتپەسە دە، ولار قالتا تەلەفوندارى ارقىلى حات-حابارلاردى لاتىنشا جازا باستادى.

تورتىنشىدەن، لاتىن عارپىنە ءوتۋ الاش قايراتكەرلەرىنىڭ دە ارمانى بولعان ەدى. احمەت بايتۇرسىن ۇلى جاساعان نۇسقا بارىمىزگە ءمالىم. بيىل الاشوردا ۇكىمەتىنىڭ قۇرىلعانىنا 100 جىل تولىپ جاتقان كەزدە، لاتىن الىپبيىنە ءوتۋىمىز جاقسىلىقتىڭ نىشانى. قالاي بولعاندا دا، 27-قازان كۇنتىزبەگە تاريحي كۇن بولىپ ەنەرى ءسوزسىز. لاتىن الىپبيىنە كوشۋ كەزەڭ-كەزەڭىمەن ىسكە اساتىنىن دا ەستە ۇستاعان ابزال. سوندىقتان، بۇل ماسەلەدە اسا كوپ قيىندىقتار پايدا بولادى دەپ ويلامايمىن.

«اياجان» كوللەدجىنىڭ ديرەكتورى ك. قۇرىمبايەۆا:

«ەلىمىز تاۋەلسىزدىك العاننان باستاپ كوپتەگەن يگى ىستەردىڭ ۇيىتقىسى بولىپ كەلەسىز. جىل سايىنعى قازاقستان حالقىنا جاسالعان جولداۋلار مەن اۋقىمدى ستراتەگيالىق باعدارلامالارىڭىز ەلىمىزدى الەمنىڭ دامىعان 30 ەلىنىڭ قاتارىنا قوسىلۋ ءۇشىن جاسالىپ جاتقان اۋقىمدى ءىس- شارالاردىڭ ءبىرى»، - دەدى ول.

ديرەكتوردىڭ سوزىنشە، ەلباسىنىڭ تاعى ءبىر ماڭىزدى باستامالارىنىڭ ءبىرى جانە انا ءتىلىمىزدىڭ كەلەشەگى ءۇشىن جاسالعان عىلىمي-الەۋمەتتىك ءمانى زور باتىل شەشىمگە قولداۋ ءبىلدىرىپ، ۇلتتىق ءتىلىمىزدىڭ دىبىستىق ەرەكشەلىكتەرىن تولىققاندى كورسەتە الاتىن ءالىپبيدى تاڭداپ، تاريحىمىزدى تاعى ءبىر جاڭالىقپەن تولىقتىردى.

ەندەشە، 2017-جىلدىڭ 26- قازانى قازاقستان ءۇشىن ەل تاۋەلسىزدىگىنىڭ تاريحىندا التىن ارىپتەرمەن جازىلاتىن ايرىقشا كۇن بولدى.

«ادىرنا» ۇلتتىق-ەتنوگرافيالىق بىرلەستىگى» قوعامدىق قورىنىڭ ديرەكتورى ارمان اۋباكىر:

«ادىرنا» ۇلتتىق- ەتنوگرافيالىق بىرلەستىگى» قوعامدىق قورى ەلباسى نۇرسۇلتان ءابىش ۇلى نازاربايەۆتىڭ لاتىن الىپبيىنە ءوتۋ جايىنداعى باستاماسىن قولدايدى. بۇل دۇنيەجۇزى قازاقتارىمەن ورتاق ءتىل تابىسىپ، قازاق ەلىنىڭ بىرلىگىن نىعايتۋعا جاسالعان ۇلكەن قادام رەتىندە باعالايمىز. سونىمەن بىرگە، تۋىستاس تۇرىك حالىقتارىمەن دە ىنتىماقتاستىق ماسەلەسىنە وڭ ىقپال ەتەدى دەپ سەنەمىز.

ءبىر كەزدەرى لاتىن ءالىپبيى قازاق جەرىندە قولدانىستا بولعان. ونىڭ ۇستىنە، ەلىمىزدە اعىلشىن ءتىلىن جەتىك بىلەتىن جاستار ءوسىپ كەلەدى. ولارعا لاتىن الىپبيىنە بەيىمدەلۋ اسا قيىندىق تۋعىزا قويار دەپ ويلامايمىز. بۇل ءبىزدىڭ تاۋەلسىزدىگىمىزدى بەكىتە تۇسەتىن قادام دەپ ەسەپتەيمىز. تاڭدالىپ الىنعان ءالىپبي نۇسقاسى بۇعان دەيىنگى نۇسقالارعا قاراعاندا الدەقايدا جوعارى دەڭگەيدە ەكەنى بايقالادى».

اۆتور: الماس مۇقاش ۇلى