كوكىرەگى پوەزياسىز ادام جوق

 استانا. قازاقپارت - اقىندىق - ءتاڭىر سىيى. ول كەز كەلگەن پەندە بالاسىنا بۇيىرا بەرمەيتىن باق. اقىندىق قاسيەت پەشەنەگە جازىلادى. شىن كوركەم دۇنيە ادامنىڭ جان دۇنيەسىن قوزعاپ، مىڭ سان ءتۇرلى كۇي كەشكىزەدى.

 ءسىرا، اقىندىقتىڭ دا مىندەتى ادام جانىنىڭ قۇپيالارىن اشۋ بولار. وسى ساتتە قازاقتىڭ كلاسسيك 3 اقىنى وسى اقىندىق تۋرالى نە دەدى؟ وقىپ، وي قورىتىڭىز!

***

 اقىندىق دەگەنىمىزدىڭ ءوزى ەكىنىڭ ءبىر ايتقىسى كەلەتىن قاراپايىم ويدى ەشكىم ايتا الماستاي قىلىپ ايتۋ عوي دەيمىن. ال ەندى، ەكىنىڭ ءبىرى ايتقىسى كەلەتىن ويدى ەكىنىڭ ءبىرى ايتاتىنداي ەتىپ ايتۋ - اقىندىق ەمەس. ول اقىندىقتى قورلاۋ!      

 قادىر مىرزا ءالي

 ***

اقىننىڭ مىندەتى - ءوز سەزىمىن ءوزى تۇتقىنداماۋ، اعىنان جارىلىپ، ازاپقا سالعان اۋىر ويدان ايتىپ قۇتىلۋ. ءوزىنىڭ جان دۇنيەسىن قاۋىمعا جايىپ سالۋ. ويىپ ايتا الدى ما، جوق پا، سەزىمىنىڭ قۇسى باسقا جۇرەكتەن ۇيا تابا الدى ما، جوق پا، وعان تورەشى - وقۋشى قاۋىم. بۇل ساپاردا اقىن وزىنە ءوزى قايشى كەلىپ جاتسا، قۋانا وتىرىپ جىلاپ، جىلاي وتىرىپ قۋانا السا، وعان تانداناتىن دانەڭەسى جوق. ول - اقىن مىنەزىنىڭ كۇردەلىلىگى، اساۋ سەزىمىنە اۋىزدىق سالا الماعاندىعى، بار سىرىن بۇگە الماعاندىعى.

مۇقاعالي ماقاتايەۆ

 ***

كوكىرەگى پوەزياسىز ادام جوق. ءومىردىڭ بۇكىل قۇبىلىسى مەن قيمىلىنا زەر سالىپ ماحابباتپەن قاراي العاندىقتان عانا ول ناعىز اقىن. سوندىقتان دا وقىرمان كوپشىلىك اقىنعا شەكسىز ىلتيپاتپەن قارايدى. ونىڭ شەكسىز شۇعىلاسىنا زاڭسىز ورتاقتاسىپ، اقىن اتىن ءجونسىز يەلەنىپ جۇرگەن جولبيكە ولەڭ كاسىپكەرلەرى ءبىزدىڭ ادەبيەتىمىزدە دە بارشىلىق بولعانىمەن، ناعىز اقىندار كەۋدەسىنەن قۇلاعان كوك ايدار ءمولدىر وزەندەر شابىسىن تاپتاتقان جوق. ادەبيەتىمىزدە ءبىز ۇناتاتىندار از بولماعانىمەن، ۇلكەندى- كىشىلى وقىرمان كوپشىلىك پەن قالامداس اعالاردان كەشىرىم وتىنە تۇرا، ءوز باسىم «تىلگە جەڭىل، جۇرەككە جىلى ءتيىپ» جاتتالىپ قالماعان ولەڭدى اقىندىق اسقاق قۋاتىنان تۋعا شىن مانىسىندەگى ناعىز پوەزيا دەپ ەسەپتەيمىن. ناعىز ولەڭ ادام دەنەسى سياقتى قۇرامدى قۇبىلىس. وعان وي دا، سەزىم دە، شەبەرلىك تە - ءبارى دە كەرەك.

 تولەگەن ايبەرگەنوۆ

Massaget.kz