ماقپال ءجۇنىسوۆا: زاكەڭ ەكەۋمىز العاشقىدا ءيت پەن مىسىق ۇقساپ ءومىر سۇردىك

استانا. قازاقپارات - ماقپال ءجۇنىسوۆا باسشىلىق قىزمەتتەگى ادامعا تۇرمىسقا شىعۋدى ەشقاشان ويلاماعانىن ايتادى.

 بۇل رەتتە قازاقتىڭ ەركە قىزى زامانبەك نۇرقادىلوۆپەن شاڭىراق كوتەرۋىن تاعدىرعا بالايدى. سەبەبى مەن ونى ارنايى ىزدەگەن جوقپىن، ءومىردىڭ ءوزى زاكەڭدى ماعان الىپ كەلدى، دەيدى حالىق ءارتيسى.

بۇل تۋرالى ماقپال مۇحامەديار قىزى Zhuldyz.tv ارناسىنىڭ «سەنبىلىك سەرۋەن» باعدارلاماسىندا.

زامانبەك نۇرقادىلوۆ پەن ماقپال ءجۇنىسوۆانىڭ ماحاببات حيكاياسىن كوپشىلىك بىلەدى. ەلدىڭ ەلەۋلى تۇلعالارىنا اينالعان بۇل جۇپقا كەزىندە قىزىعا قاراعان جاندار كوپ بولعان. الايدا سىرت كوزگە بارلىعى ءتاتتى كورىنگەنىمەن، ءار وتباسىنىڭ ءوز قۇپيالارى بولادى. ماسەلەن، ماقپال ءجۇنىسوۆا كەزىندە جارىنىڭ قالاۋىمەن دوستارىمەن ارا- قاتىناسىن ۇزۋگە ءماجبۇر بولعان. سەبەبى زامانبەك ءنۇرقادىلوۆ «نە مەنى، نە دوستارىڭدى تاڭدا» دەپ قاتاڭ تالاپ قويعان كورىنەدى.

 «ءبىر كۇنى قۇربىلارىمدى شاقىرايىنشى دەپ زاكەڭنەن رۇقسات سۇرادىم. جارايدى دەدى. زاكەڭ ءبىزدى تەكسەرگىسى كەلدى عوي دەيمىن. قىزدارمەن تانىسىپ بولعان سوڭ: «وزدەرىڭ وتىرا بەرىڭدەر، دەمالىڭدار، مەن كەدەرگى بولمايىن»، - دەپ كابينەتىنە كەتىپ قالدى. ول كەزدە زاكەڭ قالانىڭ باستىعى عوي. ءبىز دەگەن ونىڭ بارىن دا ۇمىتىپ كەتتىك. «احاحا- حيحيحي» دەپ اڭگىمەنى سوعىپ، انەكدوتتى ايتىپ، باي جايىنا قالعان... ءۇش- ءتورت ساعات وتىردىق، كەش باتىپ كەتتى، زاكەڭ ەرتەڭ جۇمىسقا بارۋى كەرەك دەگەندى ويلامايسىڭ. دوستارىممەن كەزدەسكەنىمە ءماز، راحاتتانىپ وتىرمىن عوي. زاكەڭ دە ۇندەگەن جوق.

ەرتەسىنە ايتتى: «جانۋليا، سەن مىنا دوستارىڭمەن ارالاسپاۋىڭ كەرەك. سەنىڭ دوستارىڭا ۇقسامايدى-اۋ»، - دەدى. سوسىن مەن شامدانىپ قالدىم. سول-اق ەكەن: «سەنىڭ جالعىز دوسىڭ مەن عوي. بۇل قىزدار نەگە وسى جاسقا دەيىن كۇيەۋگە شىقپاي ءجۇر؟ سەن قازىر اناۋ-مىناۋ ادام ەمەسسىڭ، مەنىڭ جارىمسىڭ. مەن ولارمەن ارالاسقانىڭدى قالامايمىن. ەگەر دوستارىمدى قالايمىن دەسەڭ، كەتە بەرۋىڭە بولادى»، - دەدى. زاكەڭنىڭ قاتتى ايتقان ءسوزى سول بولدى. سودان ءارى ويلانىپ، بەرى ويلانىپ، قوي قۇرىسىن باي كەرەك قوي دەدىم. دوستارىممەن قوشتاسۋعا تۋرا كەلدى»، - دەپ جاستىق شاعىن ەسكە الدى ماقپال ءجۇنىسوۆا.

ماقپال مۇحامەديار قىزىنىڭ ايتۋىنشا، زامانبەك ءنۇرقادىلوۆ وزىنە قارسى سويلەگەن ايەلدەردى ۇناتپاعان.

«سوندىقتان دا ول كىسىنىكى دۇرىس بولسا دا، بۇرىس بولسا دا، «سىزدىكى دۇرىس» دەي بەرەتىن بولدىق. الايدا ءبارى كەرەمەت بولدى دەپ تە ايتا المايمىن. مەن دە تىك مىنەزدى اداممىن، ايتىپ تاستايتىنمىن. باستاپقى ەكى جىل ءيت مەن مىسىقتاي ءومىر سۇردىك»، - دەپ اعىنان جارىلدى حالىق ءارتيسى.