قىرعىزستان: قازاقستان كومىر ەكسپورتىن شەكتەدى

استانا. قازاقپارات - قازاقستان قىرعىزستانعا كومىر ەكسپورتتاۋدى شەكتەپ، سونىڭ سالدارىنان ەلدە كومىر باعاسى قىمباتتاپ وتىر دەپ حابارلادى ازاتتىقتىڭ قىرعىز رەداكسياسىنا وسى ەل ەكونوميكا مينيسترلىگى جانىنداعى ايماقارالىق باسقارماسىنىڭ باستىعى زاينيدين جۇماليەۆ.

ونىڭ سوزىنشە، قازاقستاندىق كومىردىڭ سوڭعى پارتياسى 19- قازاندا جەتكىزىلگەن. قىس-كۇز ماۋسىمى باستالعاننان بەرى كومىر ادەتتە ءار بىرنەشە كۇندە ءبىر جەتكىزىلەدى.

«رەسمي تۇردە قىرعىزستانعا كومىر ەكسپورتتاۋدى شەكتەۋ تۋرالى ەشقانداي تىيىم جوق. ءتيىستى ورگاندار شەكتەۋدى ۆاگون جەتىسپەۋشىلىگى مەن قازاقستاننىڭ وزىندە دە كومىر تاپشى دەگەنمەن تۇسىندىرەدى. قازىر قازاقستاندا ءۇش مۇناي وڭدەۋ زاۋىتىنىڭ ەكەۋى جوندەۋگە جابىلعان. بەنزين تاپشى، سوندىقتان ەلدە كومىرگە سۇرانىس ارتتى» دەيدى جۇماليەۆ.

مينيسترلىك مامانى قىرعىزستان ءوزىن-ءوزى كومىرمەن 60-70 پايىزعا دەيىن قامتاماسىز ەتە الاتىنىن، قالعانى قازاقستاننان جەتكىزىلەتىنىن ايتادى. ءبىراق قازىر قىرعىزستاندا كومىر تاپشىلىعى تۋىنداۋ قاۋپى جوق.

«كومىر باعاسى قىمباتتايدى. قازىردىڭ وزىندە 15 پايىز وسكەنىن بايقاپ وتىرمىز. قىرعىزستان قازاقستانمەن ۇزدىكسىز كەلىسسوز جۇرگىزىپ جاتىر» دەدى جۇماليەۆ.

قىرعىزستان ەكونوميكا مينيسترلىگى وسىعان بايلانىستى مەملەكەتتىڭ ءۇش اي مەرزىمگە كومىر باعاسىن رەتتەۋىن ۇسىنادى. ۆەدومستۆو قازاقستانمەن شەكاراداعى جاعدايعا كومىر ەكسپورتتاۋدىڭ شەكتەلۋىنەن كومىر باعاسى قىمباتتاعانىن ايتادى.

«ازاتتىق»