ساعىنتايەۆ: قىرعىزستانعا ءار ادامعا شاققاندا جەكە تاۋارلار تىم كوپ مولشەردە كەلىپ جاتىر

استانا. قازاقپارات - قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتايەۆ قىرعىزستانعا قىتايدان يمپورتتىق تاۋارلاردىڭ ادام باسىنا شاققاندا تىم كوپ ەنىپ جاتقانىن ايتىپ ءوتتى، دەپ حابارلايدى «قازاقپارات» ح ا ا ءتىلشىسى.

«جەكە تاۋارلار يمپورتىنىڭ ساراپتاماسى ادام باسىنا شاققانداعى تاۋار تاسىمالىنىڭ قىرعىزستانعا مولشەرسىز ارتىپ كەتكەنىن كورسەتەدى. ماسەلەن، قىتايدان 2016 -جىلى قىرعىزستانعا 7710 توننا كيىم اكەلىنگەن. سالىستىرىپ قاراساق، قىتايدان رەسەيگە 4260 توننا، قازاقستانعا 327 توننا كيىم ەكسپورتتالعان.

بۇعان قوسا، ادام سانىنا شاققانداعى سانات بويىنشا قىتايدان قىرعىزستانداعى 1 ادامعا 1,3 كەلى كيىم، رەسەيدەگى 1 ادامعا 0,03 كەلى، قازاقستانداعى 1 ادامعا 0,02 كەلى كيىم اكەلىنگەنىن كورسەتىپ وتىر. وسىلايشا، قىرعىزستانعا قىتايدان قازاقستانعا قاراعاندا 65 ەسە، رەسەيگە قاراعاندا 43 ەسە كوپ كيىم اكەلىنەدى»، - دەدى باقىتجان ساعىنتايەۆ ەرەۆاندا وتكەن ەۋرازيالىق ۇكىمەتارالىق كەڭەستىڭ كەڭەيتىلگەن وتىرىسىندا.

ق ر پرەمەر-ءمينيسترى سونىمەن بىرگە، قىرعىزستانعا قىتايدان اكەلىنەتىن اياق كيىمدەردىڭ مولشەرى 46,6 مىڭ توننا نەمەسە قالىپتان 3 ەسەگە كوپ ەكەنىن جەتكىزدى. ونىڭ ايتۋىنشا، 2016 -جىلى اسپاناستى ەلىنەن قىرعىزستانعا اياق كيىمدەردىڭ 2015 -جىلى 23543 تونناسى، 2016 -جىلى 70144 تونناسى اكەلىنگەن.

«دەمەك، قىتايدان قىرعىزستانعا ءاربىر ادامعا شاققاندا (بالالاردى قوسقاندا) 15 جۇپ اياق كيىمنەن جەتكىزىلگەن. سونىمەن قاتار، جەمىس-جيدەكتەرگە قاتىستى اتالعان كورسەتكىش 1-دەن 17 پايىزعا دەيىنگى ءوسىمدى كورسەتكەن. كەدەندىك باعاعا قاتىستى سالىستىرۋ جۇمىستارى قىرعىزستاندا تاۋاردىڭ كەدەندىك باعاسى قازاقستانمەن سالىستىرعاندا ايتارلىقتاي تومەندەتىلگەنىن كورسەتىپ وتىر. ماسەلەن، ايەلدەردىڭ اياق كيىمى بويىنشا كەدەندىك باعا قىرعىزستاندا قازاقستانعا قاراعاندا 10,5 ەسەگە، ايەلدەر جەيدەسى، جاپقىشتار بويىنشا كەدەندىك باعا 7 ەسەگە از. بۇل ءتىزىمدى جالعاستىرا بەرۋگە بولادى»، - دەيدى باقىتجان ساعىنتايەۆ.

ق ر پرەمەر-ءمينيسترى جوعارىدا كەلتىرىلگەن مالىمەتتەر قىرعىزستاندا كەدەندىك قىزمەتتىڭ اكىمشىلىگىنىڭ جۇمىسى ءالسىز ەكەنىن كورسەتەتىنىن ءمالىم ەتتى.

بۇعان دەيىن حابارلاعانىمىزداي، ەۋرازيالىق ۇكىمەتارالىق كەڭەستىڭ كەڭەيتىلگەن وتىرىسىندا ق ر پرەمەر- ءمينيسترى باقىتجان ساعىنتايەۆ 2015-2017 -جىلدار بويىنشا ق ح ر مەن قىرعىزستان ءوزارا ساۋدا-ساتتىعىنىڭ كەدەندىك ستاتيستيكا مالىمەتتەرىندە ەلەۋلى ايىرماشىلىقتىڭ بارىن ءمالىم ەتكەن بولاتىن.

 

فوتو: primeminister.kz