قازاقستاننىڭ ۇزدىك مەيرامحانالارى مەن قوناق ۇيلەرى انىقتالماق

 استانا. قازاقپارات - 2018 -جىلدىڭ ناۋرىز ايىندا قازاقستاننىڭ ۇزدىك مەيرامحانالارى، قوناق ۇيلەرى جانە ۇزدىك دەپ تانىلعان وزگە دە دەمالىس ورىندارى ماراپاتتالادى، دەپ حابارلايدى قازاقپارات ءتىلشىسى.

 بۇل تۋرالى «HoReCa» قوناق ءۇي- مەيرامحانا بيزنەسى قاۋىمداستىعىنىڭ پرەزيدەنتى يگور كوپايلوۆ استانادا وتكەن باسپا ءسوز بريفينگىندە ءمالىم ەتتى. «2018 -جىلدىڭ ناۋرىز ايىندا قازاقستانداعى «ۇزدىك مەيرامحانا» ، «ۇزدىك قوناق ءۇي» ، «ۇزدىك تۇنگى كلۋب» ، «ۇزدىك رەستوباردى» انىقتايتىن تۇڭعىش «HoReCa Awards» ماراپاتىن وتكىزۋدى جوسپارلاپ وتىرمىز. بۇل شىن مانىندە ەڭ مىقتىنى انىقتايتىن ءادىل بايقاۋ بولماق. قاراشا ايىندا ارنايى كوميسسيا قۇرىپ، جۇلدە تاعايىنداۋ جۇمىستارىن باستاماقشىمىز» ، - دەدى يگور كوپايلوۆ.

 قاۋىمداستىق باسشىسىنىڭ ايتۋىنشا، العاشقى بايقاۋ استانا، الماتى، شىمكەنت قالالارىنىڭ مەكەمەلەرى اراسىندا جۇرگىزىلەدى. «كەلەسى جىلى بارلىق وبلىس ورتالىقتارىن قامتۋعا تىرىسامىز» ، - دەپ ءوز ءسوزىن تۇيىندەدى يگور كوپايلوۆ.

 

اۆتور: ايجان سەرىكجان قىزى