قازاق كۇرەسىنەن وتەتىن الەم چەمپيوناتىندا ەل نامىسىن كىمدەردىڭ قورعايتىنى بەلگىلى بولدى
بۇل تۋرالى «قازاق كۇرەسى حالىقارالىق فەدەراتسياسى» ءمالىم ەتتى.
ەلىمىزدىڭ ۇلتتىق ويىنىنا الەمنىڭ تۇكپىر-تۇكپىرىنەن 40 مەملەكەتتىڭ سپورتشىلارى قاتىسادى. ولاردىڭ قاتارىندا ا ق ش، قىتاي، اۆستراليا، ءۇندىستان، ليتۆا، رەسەي، بەلگيا، كامەرۋن باستاعان ەلدەردىڭ ەڭ تاڭداۋلى بالۋاندارى بار.
وسى الەم بىرىنشىلىگىندە 55 كەلى سالماقتا ەل نامىسىن مارات نىعماتۋللايەۆ قورعايتىن بولسا، 60 كەلى سالماقتا قۋانىش ىسقاقوۆ بەلدەسەدى. 66 كەلى سالماقتا قاسىمحان تولەنباي بوز كىلەمگە شىقسا، 74 كەلى سالماقتا عالىمجان ءابدىراحمانوۆ بەلدەسەدى.
82 كەلى سالماقتا ەرسۇلتان مۇزافاروۆقا ءۇمىت ارتساق، 90 كەلىدە ءادىلجان ىستىبايەۆ كۇرەس الاڭىنا شىعاتىن بولادى.
ال 100 كەلى سالماقتا الەكساندر كوساچيەۆ سىنعا تۇسسە، اسا اۋىر سالماقتا وسىدان ءبىر اي بۇرىن «الەم بارىسى» اتاعىن جەڭىپ العان ايبەك نۇعىماروۆ ەل نامىسىن قورعايدى. ال ابسوليۋتتى چەمپيون اتاعىنا ايبات سەيتەن تالاساتىن بولادى.
جالپى ءتول سپورتىمىزدان وتكەلى وتىرعان دوداعا 40 مەملەكەتتەن 167 بالۋان كەلەدى دەپ كۇتىلۋدە. اتالعان بالۋانعا 30 تورەشى قازىلىق ەتەدى. ونىڭ 9 ى شەتەلدىك قازىلار بولماق.
ايتا كەتەيىك، چەمپيونات 8 سالماق دارەجەسى جانە ابسوليۋتتىك دارەجە بويىنشا وتەدى. 27- قازاندا «حان شاتىر» ويىن-ساۋىق ورتالىعىندا سپورتشىلاردىڭ سالماق ولشەۋ جانە جەرەبە تاستاۋ ءراسىمى وتسە، 28-29- قازان كۇندەرى «بارىس-ارەنا» مۇزايدىنى سارايىندا جارىس وتەدى.
بىرىنشىلىكتىڭ العاشقى كۇنى سپورتشىلار 55, 90, 100 جانە 100+ كەلىدە بەلدەسسە، ەكىنشى كۇنى 60, 66, 74, 82 جانە ابسوليۋتتىك سالماق دارەجەسى بويىنشا مىقتىلار انىقتالماق.
اۆتور: كۇنسۇلتان وتارباي
