پاۆلودارلىق قاقپاشى جاراقات الىپ ويىندا قورعاۋشى قاقپاعا تۇردى - كەسكىن
الما- كەزەك شابۋىلدارمەن باستالعان ويىننىڭ اعاشقى بولىگىندە ەسەپ اشىلمادى، دەپ حابارلايدى pavlodarnews.kz.
ال، ەكىنشى تايمنىڭ 72-مينۋتىندا پاۆلودارلىق قاقپاشى داۆيد لوريا دوپقا سەكىرگەندە ءساتسىز قۇلاپ، اياعىن قايىرىپ الدى. وكىنىشكە وراي، داۆيد كەزدەسۋدى جالعاستىرا المادى. كاپيتاندى اۋىستىراتىن مۇمكىندىك بولمادى، سەبەبى، «ەرتىس» رۇقسات ەتىلگەن ءۇش فۋتبولشى اۋىسىمىن وسى ۋاقىتقا دەيىن پايدالانىپ قويعان ەدى. سوندىقتان، قورعاۋشى رۋسلان ەسىموۆ لوريانىڭ جەيدەسى مەن قولعابىن كيىپ، قاقپاعا تۇردى.
فۋتبولدا قاقپاشىنىڭ ورنىنا قورعاۋشىنىڭ قولعاپ كيىپ، قاقپانى قورعاۋى وتە سيرەك قۇبىلىس ەكەنىن ايتا كەتەيىك.
الاڭ يەلەرى 10 ويىنشىسىمەن قالعاندا، قوناقتار شابۋىلىن ۇدەتە ءتۇستى. ءبىراق، كاسىبي قاقپاشى بولماسا دا رۋسلان بىرنەشە رەت كومانداسىن مۇمكىن بولعان گولدان قۇتقارىپ جاتتى، ءتىپتى، قارسىلاستاردىڭ سوققىلارىنا تويتارىس بەردى. نەگىزگى ۋاقىت اياقتالعان سوڭ، باس تورەشى قوسىمشا 8 مينۋت ۋاقىت قوستى. ادەتتە، قوسىمشا ۋاقىت ورتا ەسەپپەن ءۇش مينۋتتان ارتىق بولمايتىن ەدى.
92-مينۋتتا اقتوبەلىك توماش شيمكوۆيچ گول سوعىپ كومانداسىن العا شىعاردى. الايدا، كەزدەسۋدىڭ ەڭ سوڭعى 97-مينۋتىندا كارلوس فونسەكا اۋەدەن كەلگەن دوپقا بيىك سەكىرىپ، تارازى باسىنا تەڭدىك ورناتتى. قورىتىندى ەسەپ - 1:1.
- بۇگىن وتە اۋىر ماتچ بولدى. ءبىز جەڭىسكە جەتۋگە تىرىسىپ ەدىك، قولدان كەلمەدى. مەن بالا كەزدەن قاقپاشى بولىپ وينايتىنمىن، ءبىراق، قازىر قورعاۋشىمىن. داۆيد جاراقات العان سوڭ جاۋاپكەرشىلىكتى الىپ، جەيدەسىن كيدىم. جەڭىسكە جەتە الماعانىمىز وكىنىشتى ارينە. قولداۋ بەرگەن بارشا جانكۇيەرلەرگە العىسىم شەكسىز، - دەدى ماتچ قاھارمانى رۋسلان ەسىموۆ.
