پاريجدەگى يۋنەسكو- دا «رۋحاني جاڭعىرۋ» باعدارلاماسى تانىستىرىلدى

 استانا. قازاقپارات - «جاھاندىق الەمدەگى قازىرگى قازاقستاندىق مادەنيەت» جوباسىن يۋنەسكو- نىڭ پاريج قالاسىنداعى شتاب پاتەرىندە تانىستىرۋ اياسىندا «قوعامدىق سانانى جاڭعىرتۋ: نۇرسۇلتان نازاربايەۆ مودەلى» حالىقارالىق- تاجىريبەلىك كونفەرەنتسياسى ءوتتى.

كونفەرەنسيا سەسسيالارى الەمدىك تاجىريبە كونتەكستىندە رۋحاني جاڭعىرۋدىڭ قازاقستاندىق مودەلى، مادەني مۇرا - ۇلتتىق بىرەگەيلىكتىڭ وزەگى، قوعامنىڭ بىرىگۋى - حالىقارالىق تۇراقتىلىقتىڭ نەگىزگى رەسۋرسى، مادەنيەتتەر ىقپالداستىعى - قوعامداعى بەيبىتشىلىك پەن ديالوگ نەگىزى تاقىرىپتارى بويىنشا ءبولىندى. قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىن ق ر پرەزيدەنت اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ايدا بالايەۆا تانىستىردى.

«ساندى تەحنولوگيالاردىڭ قارقىندى دامۋى جانە ولاردىڭ بارلىق دەرلىك سالاعا ەنۋى ناتيجەسىندە الەۋمەتتىك- ەكونوميكالىق قاتىناستاردىڭ جاڭا پاراديگماسى تۋىندادى. مازمۇندىق جاعىنا وتپەس بۇرىن وسى باستاماعا تۇرتكى بولعان تاريحي لوگيكاسىنا توقتالايىن. تاۋەلسىزدىكتىڭ شيرەك عاسىرى ارالىعىندا ءبىزدىڭ ەلىمىز نارىقتىق ەكونوميكالى دەموكراتيالىق مەملەكەتكە اينالۋى جولىندا باتىل رەفورمالار جاسادى. وتپەلى كەزەڭنىڭ قيىندىقتارىن ەڭسەرگەن قازاقستان قارقىنىن باسەڭدەتكەن جوق. 2012 -جىلى پرەزيدەنت نۇرسۇلتان نازاربايەۆ قازاقستاندى وزىق 30 ەلدىڭ قاتارىنا كىرگىزۋدى ماقسات ەتەتىن دامىتۋدىڭ 2050 -جىلعا دەيىنگى ستراتەگياسىن ۇسىندى. بۇل ماقساتتى ورىنداۋدىڭ نەگىزگى مەحانيزمى - ادامي كاپيتال بولاتىن. الەم ءبىر ورىندا تۇرمايدى، ءبىز عالامات وزگەرىستەر كۋاسى بولدىق. ءومىر سالتى مەن ويلاۋ داعدىسىن وزگەرتۋگە بولماس، الايدا ءبىلىم بەرۋ جانە ناقتى ءىس- ارەكەتتەر ارقىلى قالىپتاستىرۋعا بولادى. ەلباسىمىز مۇنى جالپى ۇلتتىق جوبالار جۇيەسى ارقىلى ىسكە اسىرۋدى ۇسىندى. بۇل جوبالاردىڭ ءارقايسىسى جاڭعىرتۋ ورتاسىن قالىپتاستىرىپ، قوعامدى وسى ورتاعا تارتادى. وسى ماقساتتا 6 جالپىۇلتتىق جوبالار ۇسىنىلعان بولاتىن، » - دەگەن ايدا عالىم قىزى ءاربىر جوباعا توقتالىپ، ولاردىڭ ىسكە اسىرىلۋ بارىسى جايلى تولىققاندى ماعلۇمات بەردى.