يراك اسكەرى كيركۋك قالاسىنا كىردى

استانا. قازاقپارات - يراك اسكەرى كۇردتەر باسقاراتىن داۋلى كيركۋك قالاسىنا كىرىپ، قالالىق كەڭەستىڭ باس كەڭسەسىن باقىلاۋىنا الدى.

قالا تۇرعىندارىنىڭ Reuters اگەنتتىگىنە ايتۋىنا قاراعاندا، يراك اسكەري كۇشتەرى قالالىق كەڭەس عيماراتىنىڭ ۇستىنەن كۇردتەر تۋىن الىپ تاستاعان، قازىر وندا يراك تۋى عانا تۇر. كۇردتەر تۋى بۇل جەرگە بيىل ساۋىردە تىگىلگەن بولاتىن.

قالادان مىڭداعان تۇرعىن كەتىپ قالعانى حابارلانىپ جاتىر. كۇردتەردىڭ پەشمەرگا جاساقتارى كيركۋك پروۆينتسياسىنىڭ كوپ بولىگىن 2014-جىلى «يسلام مەملەكەتى» (ي م) ەكسترەميستىك ۇيىمىنىڭ سودىرلارى يراكتىڭ سولتۇستىك بولىگىن باسىپ العان سوڭ باقىلاۋعا العان.

يراك پرەمەر-ءمينيسترى حايدار ءال-ابادي كۇردىستان اۆتونومياسى مەن وعان جاقىن ايماقتاردا، ونىڭ ىشىندە كيركۋكتە 25- قىركۇيەكتە تاۋەلسىزدىك الۋ جونىندە رەفەرەندۋم وتكەن سوڭ «ەلدىڭ تۇتاستىعىن قورعاۋ ءۇشىن» وپەراتسيا جۇرگىزۋ قاجەتىن مالىمدەگەن.

كۇردىستان بيلىگى ايماق تۇرعىندارىنىڭ باسىم كوپشىلىگى تاۋەلسىزدىك الۋدى قولداپ داۋىس بەرگەنىن مالىمدەگەن. باعداد رەفەرەندۋمدى زاڭسىز دەپ تانىعان.

15- قازاندا كۇردىستان داعدارىسىن تالقىلايتىن كەلىسسوز كۇردتەردىڭ باسشىلارى رەسمي باعدادتىڭ رەفەرەندۋم ناتيجەلەرىن جويۋ تۋرالى تالابىن ورىنداۋدان باس تارتقان سوڭ وتپەي قالعان.