قازاقستان قىتايعا گاز ەكسپورتتاۋدى باستادى
راسىمگە ق ر ەنەرگەتيكا ءمينيسترى قانات بوزىمبايەۆ، «قاز مۇناي گاز» ۇ ك ا ق- نىڭ باسقارما ءتوراعاسى ساۋات مىڭبايەۆ، «قاز مۇناي گاز» ۇ ك» ا ق ۆيتسە- پرەزيدەنتى قايرات شارىپبايەۆ، «قاز ترانس گاز» ا ق باس ديرەكتورى رۋستام سۋلەيمانوۆ قاتىستى. شىمكەنت قالاسى ماڭىندا ورنالاسقان «اقبۇلاق» گاز ولشەۋ ستانساسىمەن ونلاين بايلانىس ارقىلى وتكەن ءراسىم كەزىندە قازاقستاندىق گازدى ەكسپورتقا جىبەرۋ جۇزەگە اسىرىلدى.
«قاز مۇناي گاز» ۇ ك ا ق گاز تاسىمالداۋ جانە ماركەتينگى جونىندەگى ۆيتسە- پرەزيدەنتى قايرات شارىپبايەۆتىڭ اتاپ وتۋىنشە، بۇل تەك گاز سالاسىنىڭ دامۋىنا عانا ەمەس، جالپى ەلىمىزدىڭ ەكونوميكاسىن دامىتۋعا دا جاڭا سەرپىن بەرەتىن ۇلكەن وقيعا.
«قازاقستاندىق گازدىڭ قىتاي نارىعىنا شىعارىلۋى ەۋرازيالىق ءوڭىر ەلدەرىنىڭ اراسىنداعى ساۋدا جانە كولىك بايلانىستارىن رەتتەۋگە، ورتاق ينفراقۇرىلىم قۇرۋعا باعىتتالعان ءوزارا ءتيىمدى قارىم- قاتىناستار ورناتۋعا ىقپال ەتەتىن بولادى»، - دەدى ول.
بۇعان دەيىن حابارلانعانداي، قازاقستان رەسپۋبليكاسى مەن قىتاي حالىق رەسپۋبليكاسىنىڭ اراسىندا 5 ميلليارد تەكشە مەتر قازاقستاندىق گازدى ەكسپورتتاۋ تۋرالى تاريحي كەلىسىمشارتقا قول قويىلدى. «قازترانسگاز» ا ق مەن «PetroChina International Company Limited» كومپانياسى اراسىندا ساتىپ الۋ- ساتۋ شارتىنا قول قويىلدى. گازدىڭ رەسۋرستىق بازاسى رەتىندە قازاقستاننىڭ باتىسىنداعى گاز كەن ورىندارى جانە «قازترانس گاز» ا ق باسقارۋىنداعى جەراستى گاز قويمالارىندا جيناقتالعان گاز قورى ايقىندالىپ وتىر. قىتاي تاراپىنىڭ گازدى قابىلداۋ پۋنكتى رەتىندە «قورعاس» شەكارا بەكەتى بەلگىلەندى. قازاقستان اۋماعىنداعى تابيعي گازدى ەكسپورتتاۋ مارشرۋتى 3 مىڭ شاقىرىمدى قۇرايدى، تاسىمالداۋ پروتسەسسىنە 10-نان استام كومپرەسسورلىق ستانسا جۇمىلدىرىلعان. قازاقستاندىق گازدى قىتايعا ەكسپورتتاۋعا «بەينەۋ- بوزوي- شىمكەنت» م گ ق جانە «ورتالىق ازيا - قىتاي» ترانسۇلتتىق گاز قۇبىرىنىڭ رەسۋرستارى پايدالانىلاتىن بولادى.
اۆتور: مارلان جيەمباي
