اللا الدىندا انت بەرگەن مۇسىلمان ايەلى جەتىنشى مۇگەدەك بالانى ءوز اسىراۋىنا الدى
داعىستان ەلىندە تۇراتىن مادينات شاحبۋلاتوۆا ەسىمدى مۇسىلمان ايەلى وسىمەن 7 مۇگەدەك بالانى ءوز اسىراۋىنا الىپ وتىر. استراحان قالاسىنداعى «مالىشوك» اتا- اناسىز قالعان بالالارعا كومەك كورسەتۋ ورتالىعىندا تۇرىپ كەلگەن اناستاسيا ەندى ءوزىنىڭ التى قۇربىسىمەن بىرگە باقىتتى ءومىر كەشەتىن بولماق.
مادينات شاحبۋلاتوۆانىڭ بۇعان دەيىن اسىراپ العان التى پەرزەنتى دە وسى ورتالىقتىڭ تاربيەلەنۋشىلەرى بولعان ەكەن. اناستاسيامەن جاقسى دوس بولىپ كەتكەن ولار ونىڭ وزدەرىمەن بىرگە تۇرعانىن قالايتىنىن ايتىپ، ءوتىنىش بىلدىرگەن.
ايتا كەتەيىك، مادينات شاحبۋلاتوۆا اقىل- ويى مەن دەنە دامۋىندا كەمىستىگى بار سابيلەردى اسىراپ الۋدى بىلتىرعى جىلدان باستاعان. ءدال وسى جىلى ول اۋىر حالدە جاتقان تۋعان ۇلىنىڭ ءدام- تۇزى ۇزارىپ، ساۋىعىپ كەتەر بولسا، ناۋقاس بالالارعا بارىنشا كومەك كورسەتۋگە ۋادە بەرگەن ەكەن.
ماحاچكالاداعى كيروۆ اۋدانىنداعى «اسىراپ الۋ جانە قامقورلىق» ءبولىمىنىڭ ءتوراعاسى ۋما مۋسايەۆانىڭ ايتۋىنشا، اتالمىش جانۇيادا بالالارعا قاجەتتى بارلىق جاعداي جاسالعان. بۇدان بولەك، بالالارعا مەديتسيانالىق ورتالىقتا تەگىن كومەك كورسەتىلەتىن بولادى» ، - دەيدى ول.
Muslim.kz
