ايگىلى اكتەر دوسحان جولجاقسىنوۆتىڭ جاس كەلىنشەگى ءوزىن «توقال» دەپ سىناعاندارعا جاۋاپ بەردى
«دوسحانمەن باسى بوس كەزدە قوسىلدىم» دەگەن ول ءوزىن سىناعان جۇرتقا جاۋاپ بەردى.
بۇل تۋرالى «استانا» ارناسىنىڭ «سىرلاسۋ» باعدارلاماسىندا حابارلايدى.
سۇلەيمەنوۆانىڭ ايتۋىنشا، ەل اراسىندا دارحان پەيىلدى، اق جۇرەكتى جاندار كوپ. الايدا تىرناق استىنان كىر ىزدەپ، ءمىن تاعاتىندار دا بارشىلىق.
«بىرىنشىدەن، قازاقتىڭ كوڭىلىنەن اينالدىم. سەبەبى جاقسى ادامدار كوپ. جاقسى كوڭىل، نيەت ءبىلدىرىپ جاتادى، باقىت، دەنساۋلىق تىلەيدى، ۇلگى تۇتامىز دەيدى. مىڭ دا ءبىر راحمەت ول كىسىلەرگە. ال ەندى كەرى جازاتىن پىكىرلەرگە دە سالماقتى قارايمىن. سەبەبى ءومىر سولاي ۇيرەتتى. وعان جەڭىل قاراپ ۇيرەنۋ كەرەك. ول وڭاي ەمەس.
ەرتە ەسەيدىم مەن، سوندىقتان دا بولار، مەن دوسەكەڭنىڭ وڭ جاڭباسىنا كەلىپ، تاعدىر ءبىزدى قوستى. ءبىز كوپ جۇرگەن دە جوقپىز، ءبىر-ءبىرىمىزدى جاقسى تاني المادىق تا. ەكى ايدىڭ ىشىندە بۇل كىسى مەنى اينالدىرىپ، توق ەتەر ءسوزىن ايتتى»، - دەگەن اكتريسا جان-جارىمەن تابىسقان كەزدى ەسىنە الدى.
بۇدان بولەك، جولجاقسىنوۆتىڭ كەلىنشەگى ءوزىن «توقال» دەپ سىناعاندارعا جاۋاپ بەردى.
«سوندا كەي-كەزدەرى ەل: «توقالسىز با؟» - دەپ سۇراق قويادى. سوعان تاڭعالامىن. سەبەبى بىرگە تۇرىپ جاتقانىمىزعا 29 جىلعا شىعىپ جاتىر. ەگەر دە بۇل كىسىنىڭ باسى بوس بولماعاندا، مەن بۇل كىسىمەن كەزدەسپەك تۇگىلى، سويلەسپەيتىن دە ەدىم. بۇل - شىندىق. سەبەبى ءبىزدىڭ اتا-انامىز بەرگەن تاربيەسى بويىنشا، كەز كەلگەن ماقساتقا ءارتۇرلى جولمەن جەتۋگە بولادى، ءبىراق ادال جولمەن جەتۋ كەرەك.
وسى ادالدىق دەگەن نارسەنى ماڭدايىما بالتامەن شاپقانداي، بويىما بالا كەزدەن ءسىڭىرىلدى. بۇل - حارام، بۇنىڭ دا سۇراۋى بار، بۇل كۇنا دەپ. «قىز بالانىڭ ءوزىنىڭ سەزىم ءبىلدىرۋى ولىممەن تەڭ» دەگەن قاعيدانى اجەمىز ايتىپ وتكەن. مەن ەشكىمنىڭ وتباسىنىڭ اراسىنا تۇسكەن جوقپىن، قازاقشالاپ ايتقاندا ويناستىق جاساعان جوقپىن، وتىرىك كۇلىپ جۇرگەن جوقپىن، ءتىپتى، قىلتىڭ-سىلتىڭىم بولعان ەمەس. جالپى، العاش كورگەندە بۇل كىسى ماعان ۇناعان دا جوق»، - دەدى اعىنان جارىلىپ ول.
