قازاقستاندا تۇڭعىش رەت ءبىر-بىرىنە سايكەس كەلمەيتىن ادام اعزاسىن الماستىرۋ وتاسى باستالدى
بۇگىنگى وپەراتسيانىڭ وزگەشەلىگى سول، ەكى ادامنىڭ قان توپتارى ءبىر-بىرىنە سايكەس كەلمەيدى.
استاناداعى ۇلتتىق ونكولوگيا مەن ترانسپلانتولوگيا عىلىمي ورتالىعى شەتەلدىك مامانداردىڭ كومەگىمەن اتالعان وتانى جاساۋعا كىرىستى، دەپ حابارلايدى قازاقپارات ءتىلشىسى.
ورتالىقتىڭ باس حيرۋرگى توقان سۇلتاناليەۆتىڭ ايتۋىنشا، ەكى دونور (اۋرۋلارعا جانە جارالى ادامدارعا اعزاسىن نەمەسە قانىن بەرەتىن ادام) مەن رەسەپيەنت (قان نە باسقا ءدارى قۇيىلۋعا ءتيىستى اۋرۋ ادام) ءبىر-بىرىنە تۋىس بولىپ كەلەدى. الايدا ەكەۋىنىڭ قانى ەكى بولەك. «بۇرىن قان توپتارىنىڭ سايكەس بولۋىن قاتاڭ باقىلايتىن. سوڭعى جىلدارى جاپونيا مەن كورەيا قان توپتارى سايكەس كەلمەيتىن ادامداردىڭ باۋىرىن الماستىرۋ جاعىنان ءبىراز جەتىستىكتەرگە جەتتى. ءبىز دە وسى تاجىريبەگە ۇيرەنۋىمىز كەرەك. ونداي وتانى جاساۋ ءۇشىن رەسەپيەنتتىڭ، ياعني باۋىر الماستىرۋدى قاجەت ەتەتىن ادامنىڭ يممۋنيتەتىن بارىنشا السىرەتەدى. سول كەزدە ونىڭ اعزاسى جاڭا ورگاندى جاقسى قابىلدايدى. ارتىنان يممۋنيتەتتى بىرتە- بىرتە كۇشەيتەدى»، - دەيدى سۇلتاناليەۆ.
باس حيرۋرگتىڭ ءوزى بۇگىنگى وپەراتسياعا قاتىسپايدى. ونى سەۋل ۇلتتىق ۋنيۆەرسيتەتى حالىقارالىق دەنساۋلىق ساقتاۋ ورتالىعىنىڭ اتقارۋشى ديرەكتورى كۆاڭ ۆۋڭ لي جاسايدى. ورتالىق ماماندارى بولسا، كورەيا تاجىريبەسىن جان-جاقتى مەڭگەرەتىن بولادى. كۆاڭ ۆۋڭ ليدىڭ ءوزى بۇعان دەيىن مىڭنان استام باۋىر الماستىرۋ وتاسىن جاسادى. سونىڭ ىشىندە 80 گە جۋىعى قاننىڭ سايكەس كەلمەۋىنە ارنالدى. «شىنى كەرەك، ونداي وتالاردى جاساۋ وڭاي ەمەس. دەگەنمەن، ودان كەيىن ادام ءولىمى ءجيى بولادى دەپ ايتا المايمىن. ادەتتەگىدەي، رەتسەپيەنت 1-3-ايدىڭ ىشىندە وڭالىپ كەتەدى. نەگىزى، قازاقستاندا جاڭا ادىسپەن باۋىر الماستىرۋدى جاساۋعا ابدەن بولادى. تەxنيكالىق جاعدايى دا جەتەدى. ەندى، حالىقارالىق حاتتامالار ماسەلەسىن رەتتەپ السا، وسى ساناتتاعى وپەراتسيالاردى ەمىن- ەركىن جاساي الادى»، - دەيدى لي مىرزا.
ايتا كەتەيىك، بۇگىنگى وپەراتسيا 8-9 ساعاتقا سوزىلادى. مامانداردىڭ ايتۋىنشا، ەكى اپتادان كەيىن دونوردىڭ باۋىرى 30 پايىزى ۇلكەيەدى. ال ءبىر ايدان كەيىن قايتا ءوز قالپىنا كەلەدى.
