التاي اۋدانىنا وڭتۇستىك وڭىرلەردەن قونىس اۋدارعاندار جەكە كاسىپتەرىن اشىپ جاتىر

نۇر-سۇلتان. قازاقپارات- شىعىس قازاقستانداعى التاي قالاسىنا كوشىپ كەلگەن الماتىلىق جاس وتباسى ءوز كاسىپتەرىن اشىپ، كوپتەن بەرى جوسپارلاعان ماقساتتارىنا قول جەتكىزدى.

ولار مەملەكەتتىك باعدارلاما قولداۋىن ەركىن پايدالانىپ، قارجىلاي قولداۋعا يە بولدى. جالپى وڭتۇستىك وڭىرلەردەن وسى التاي اۋدانىنا وتكەن جىلى 67 وتباسى قونىس اۋدارعان. بارلىعى باسپانامەن قامتىلىپ، جۇمىسقا ورنالاستى.

كۋلەشوۆتار وتباسىن جاس كونديتەرلەر دەۋگە بولادى. وسىعان دەيىن پرەزيدەنتتىك كەشەندە اسا لاۋازىمدى تۇلعالارعا ءتاتتى دامدىلەر ازىرلەپتى. جاستاردىڭ ايتۋىنشا، ول جەر قانشا جايلى بولعانمەن، جەكە كاسىپتىڭ ورنى بولەك. سوندىقتان جەكە كوفەينيي اشۋعا بەل بۋادى. وسىلايشا ارمان قۋعان ولار التاي قالاسىنا كوشىپ كەلەدى. شاعىن قالا كاسىپكەرلەرىنە كورسەتىلەتىن مەملەكەتتىك قولداۋعا يە بولىپ، كاسىپتەرىن باستاپ كەتكەن.

جاننا كۋلەشوۆا، جەكە كاسىپكەر:

- ءبىزدىڭ بالالىق شاقتاعى ارمانىمىز ورتاق بولىپ شىقتى. ول ءدامدى كوفە ۇسىناتىن ادەمى ءبىر ورىن اشۋ بولدى. ءىرى شاھاردا ونداي ويدى جۇزەگە اسىرا قويۋ قيىن. سوندىقتان وسىنداي اۋداندىق جەردە نەگە اشىپ كورمەسەك دەگەن يدەيا كەلدى.

«بيزنەس باستاۋ» باعدارلاماسى ارقىلى العان العاشقى 500 مىڭ تەڭگەدەن استام گرانتتى دميتري مەن جاننا كوفەينيدىڭ جابدىقتارىن الۋعا جاراتقان. سوڭىنان «بيزنەستىڭ جول كارتاسى» جوباسىمەن 2 ميلليون تەڭگە جەڭىلدەتىلگەن نەسيەگە دە يە بولادى.

ايتا كەتەيىك، ءبىر جىل ىشىندە وسى التاي اۋدانىنا وڭتۇستىك وڭىردەن 200 ادام كوشىپ كەلگەن.

تيمۋر جيگيتايەۆ، التاي اۋدانى اكىمىنىڭ ورىنباسارى:

- وڭتۇستىكتەن وسىندا قونىستانعان اعايىندارعا كەلە سالا مەملەكەتتىك باعدارلاماعا ساي كومەكتىڭ بارلىعىن كورسەتتىك. جالپى 52 ميلليون تەڭگە سۋبسيديا ءبولىندى. باسپانالارىن الىپ، وسى جاقتا وزدەرىن كاسىپكەر رەتىندە سىناپ كورىپ جاتقاندار بار.

جەكە كاسىپكە دەن قويعان 9 ازامات مەملەكەتتىك باعدارلاما بويىنشا گرانت الىپ تا ۇلگەرگەن. ولار مال ءوسىرىپ، باۋ- باقشامەن اينالىسىپ، قوعامدىق تاماقتاندىرۋ ورىندارىن اشىپ جاتىر.

www.24.kz