دۇنيە - اينا

 استانا. قازاقپارات - ەرتە ەرتە ەرتەدە.. . ءبىر سۇلتان ۇلكەن ساراي سالىپتى. سارايدىڭ ءىشىن تۇتاستاي اينامەن قاپتاپتى. بارلىق بولمەنىڭ قابىرعاسى، استى- ءۇستى اينا بولعان ەكەن.

ءبىر كۇنى سارايدىڭ ىشىنە سۇلتاننىڭ ءيتى جۇگىرىپ كىرىپتى. اينالاسىنا قاراسا، مىڭداعان ءيت قورشاپ الىپتى. بارلىق جاقتان وعان يتتەر قاراپ تۇر. يتتەردەن قورىقسا دا، قورىققانىن بىلدىرمەۋ ءۇشىن ءتىسىن اقسيتتى. وسىلايشا باسقالاردى قورقىتپاقشى بولادى. سويتسە، مۇنىمەن قوسا بارلىق يتتەر دە ءتىسىن اقسيتتى. ءيت ىرىلداسا، باسقا يتتەر دە ىرىلدادى. ەندى ءيت باسقا يتتەرگە قارسى ۇرە باستايدى. بار كۇشىن سالىپ ءۇردى. ءبىر قاراسا، جان- جاعىنان باسقا يتتەر دە ونىڭ ۇرگەنىنەن قاتتىراق ۇرە باستايدى. ول قانشا ۇرسە، يتتەر دە قويماي وعان ءۇردى. تاڭەرتەڭ بولمەگە كىرگەن سۇلتان ءيتتىڭ ءولىپ قالعانىن كورەدى. بولمەدە يتتەن باسقا ەشكىم جوق، تەك قانا جان- جاعى اينا. ەشكىم دە يتكە قارسى ۇرمەدى، ەشكىم ونى قورقىتپادى. اينالارعا قاراپ ءوزىن كورگەن ءيت، ايناداعى ءوز بەينەسىنەن قورقىپ، وزىمەن- ءوزى شايقاسقان بولدى. ىشىڭىزدەگى كەدەرگىلەردەن باسقا سىرتتاعىلار ەش كەدەرگى بولا المايدى. قانداي بولساڭىز، اينالاڭىزدى دا سونداي ەتىپ كورەسىز. دۇنيە -  ىشىڭىزدەگىنى كورسەتەتىن شىنايى اينا.

 Massaget.kz