قىتايدا تۇرمەدە وتىرعان اقجارقىن تۇرلىبايدىڭ اقتالۋىنا سەنىم بار - قورعاۋشى

الماتى. قازاقپارات - اقجارقىن تۇرلىباي مەن ماريا داپيركانىڭ قورعاۋشىسى سۇڭقار نۇرماعامبەتوۆ ەكى قىزدىڭ دا تاعدىرىنا بايلانىستى بولجامىمەن ءبولىستى.

قازاقپارات تىلشىسىنە بەرگەن سۇحباتىندا قورعاۋشى شۋلى ىستەردىڭ سوڭى نەمەن اياقتالۋى مۇمكىن ەكەندىگىن ايتىپ بەردى.

- بۇگىندە  قىتايلىق تۇرمەدە جاتقان قازاقستاندىق اقجارقىن تۇرلىباي مەن رەسەي ازاماتى ماريا داپيركا بار. ەكى ءىستىڭ اراسىندا قانداي بايلانىس بار؟

- اقجارقىن مەن ماريا ەسىرتكى تاسىمالدادى دەگەن ايىپپەن سوتتالدى. ەكى وقيعا دا 2014 -جىلى بولعان. گۋانچجوۋ اۋەجايىندا اقجارقىننىڭ سومكەسىنەن پوليتسيا 4,5 كەلى ەسىرتكى تاپقان بولاتىن. بۇدان ءسال از، 2,7 كەلى ەسىرتكىنى ماريانىڭ سومكەسىنەن ۆەتنام پوليتسياسى تاپتى. بۇل ەكى ىستە دە قىزدار جازاسىن شەتەلدە وتەپ جاتىر. ىستەردىڭ سوڭعى شەشىمى دە ۇقساس اياقتالۋى مۇمكىن. قازاقستاندىقتاردىڭ كوپشىلىگى 18 جاستاعى نازىك قىز جالعىز ءوزى ەسىرتكى تاسىمالدادى دەگەنگە سەنبەيدى. ونىڭ جاعدايى تۋرالى نە ايتۋعا بولادى؟ ارينە، وعان قازىر قيىن. ەرەسەك ەر ادامدار دا تۇرمەنىڭ جاعدايىنا شىداي المايدى. ازيا ەلدەرىندەگى تۇرمەلەردە ءتارتىپ قاتال. ايتا كەتۋ كەرەك، اقجارقىن قىتايعا العاش رەت شىققان. بۇرىن ونىڭ ءتولقۇجاتى دا بولماعان. ەسىرتكىمەن كۇرەس ورتالىق ازيا وڭىرلىك اقپاراتتىق ورتالىعىنىڭ حابارلاۋىنشا، اقجارقىن مەن ماريا داپيركا نيگەريالىق ناركومافيانىڭ قۇربانى بولعان.

ەكى جاعدايدا دا ترانس ۇلتتىق(مەملەكەت ارالىق - رەد.) ەسىرتكى توبى جۇمىس ىستەگەنى كورىنىپ تۇر. ولار بۇرىنعى كەڭەس وداعى ەلدەرىندەگى ادامداردى ەسىرتكى بيزنەسىنە جەگۋمەن اينالىسىپ جۇرگەن. قىلمىسكەرلەر ادامنىڭ سەنىمىنە كىرەدى. ونىمەن ماحاببات قۇرۋى دا مۇمكىن. اقجارقىن الماتىداعى ءدامحانالاردىڭ بىرىندە داياشى بولىپ جۇمىس ىستەگەن. بارمەن دجونني دە وسى ءدامحانادا قىزمەت ەتكەن. دجونني اقجارقىنعا تاۋار جەتكىزىپ بەرشى دەپ وتىنەدى. اقجارقىنعا ق ح ر ق ك 374-بابىمەن قىلمىس جاسادى دەگەن ايىپ تاعىلدى.

بۇل باپ بويىنشا، ول 20 جىلعا نەمەسە ءومىر بويىنا بوستاندىعىنان ايرىلىپ نەمەسە ءولىم جازاسىنا كەسىلۋى مۇمكىن.

2017 -جىلدىڭ قازانىندا وسى ىسكە نۇكتە قويىلۋى ىقتيمال. ءبىراق ۋاقىتى وزگەرۋى دە عاجاپ ەمەس.

- اقجارقىندى ەلگە قايتارۋعا مۇمكىندىك بار ما؟

- ارينە. بۇل جەردە قازاقستان- قىتاي قاتىناسى ۇلكەن ءرول وينايدى. اقجارقىن قىتايدا سوتتالسا دا، حالىقارالىق كەلىسىم بويىنشا ول قازاقستانعا بەرىلەدى. الايدا ونىڭ بىرنەشە شارتى بولۋى مۇمكىن. ول ءۇشىن بۇل ءىس قىتاي قاۋىپسىزدىگىنە قاتەر توندىرمەۋى شارت.

مەن اقجارقىننىڭ ءىسى قىتايدىڭ قاۋىپسىزدىگىنە زارەدەي كەسىرىن تيگىزبەيدى دەپ ويلايمىن.

- نەگە ماريا داپيركانى دا ءسىز قورعايسىز؟ رەسەيدە دە تاجىريبەلى قورعاۋشىلار بار عوي؟

- بىرىنشىدەن، بىزدە تاجىريبە بار. ماريانىڭ تۋعان تۋىسقاندارى دا اقجارقىننىڭ ءىسىن كوردى. سول سەبەپتى مەنىمەن بايلانىسقا شىقتى.

- داپيركا ىسىندە ءۇمىت بار ما؟

- قازىر ءىس ماريانىڭ قىلمىستىق وي-پيعىلىن انىقتاۋ ءۇشىن حوشيمين پروكۋراتۋراسىنا جىبەرىلدى.

- ەكى ءىستىڭ دە اقىرىنان نە كۇتەسىز؟

 - ماريا داپيركاعا كەلسەك، ول ءوز كىناسىن مويىندامايدى.

سوت ۇكىمى ماريانى ايىپتى دەپ شەشسە، ۇكىمنىڭ ورىندالۋى رەسەيدە جۇزەگە اسۋىن سۇرايتىن بولامىز. سەبەبى، ەكى ەل اراسىندا ۆەتنام جەرىندە قىلمىس جاساعان رەسەيلىك ازامات ەلىنە قايتارىلادى دەگەن كەلىسىم بار. ودان ارعى ارەكەتىمىزدە ءبىز قىلمىستىڭ كەشىرىلۋىن وتىنەتىن بولامىز. اقجارقىنعا كەلسەك، ول ءوز كىناسىن مويىنداماي وتىر. سوندىقتان، ول اقتالادى دەپ سەنىپ وتىرمىز.

- سۇحباتىڭىزعا راحمەت.