تۇركيادا كولىك اپاتىنا تۇسكەن قازاقستاندىقتار ەلباسىعا العىس حات جولداماق - فوتو
ولار ەلگە امان ورالۋىنا بار مۇمكىنشىلىكتەردى قاراستىرعان بيلىك وكىلدەرىنەن باستاپ، جۋرناليستەر قاۋىمىنا دا ءدان ريزا. بۇل تۋرالى قازاقپارات تىلشىسىمەن سۇحباتتاسقان ەرلى- زايىپتى نۇرسۇلتان ورىنباساروۆ پەن الماگۇل نۇراسىلوۆا ايتتى، دەپ حابارلايدى قازاقپارات ءتىلشىسى.
قازىرگى تاڭدا جاس جۇبايلاردىڭ جاعدايلارى قالىپتى. ولار دۇيسەنبى كۇنى الماتىداعى اۋرۋحانادان تالدىقورعانداعى كوپسالالى اۋرۋحاناعا اۋىستىرىلدى. پوليتراۆما بولىمىندە جاتقان ناۋقاستار اق حالاتتىلاردىڭ ءجىتى باقىلاۋىندا.
«تۇركيادا نۇراسىلوۆانىڭ وڭ جاق يىعىنا، سول جاق بىلەگىنە وتا جاساعان. سونىمەن قاتار ول باس-مي جاراقاتىن العان. ال ورىنباساروۆتىڭ جامباس، سول جاق ورتان جىلىگىنىڭ ۇرشىق باسى سىنىپ، سول جاقتا وپەراتسيا جاسالعان. بارلىق وتالار ستاندارتقا سايكەس جۇزەگە اسقان. ەندى وسى ەكى ناۋقاس ءبىر-ەكى اپتا رەابيليتاتسيالىق كەزەڭنەن وتەدى. كەشە تۇسە سالعاننان كەيىن بۇكىل اناليزدەرىن الدىق. كلينيكالىق زەرتتەۋلەر جۇرگىزدىك. بارلىعى تۇراقتى. بۇگىننەن باستاپ رەابيليتاتسيادان وتۋدە»، - دەدى تالدىقورعان قالالىق كوپسالالى اۋرۋحاناسىنىڭ پوليتراۆما ءبولىمىنىڭ مەڭگەرۋشىسى اناربەك موڭعول.
نۇرسۇلتان مەن الماگۇلدىڭ ايتۋىنشا، ولار تۇركيادا بال ايىن اتاپ وتپەك بولعان. قىركۇيەكتىڭ باسىندا عانا شاڭىراق كوتەرگەن جاستار وزگە ەلگە نە سەبەپتى ساقتاندىرۋ قۇجاتىنسىز بارعاندارىن ايتا الماۋدا. ول قۇجاتتىڭ ماڭىزى زور ەكەندىگىن دە بىلمەگەن.
«شىنىمىزدى ايتساق، ول ساقتاندىرۋ قۇجاتى جايلى ويلامادىق. ءبىز تۇركياعا ءوز كۇشىمىزبەن ساپارلاپ باردىق. شىنىمەن، ساقتاندىرۋسىز بارعانىمىز دۇرىس بولمادى. ول كىنامىزدى مويىندايمىز. نەگىزىندە بىزگە ەلىمىز وسىنداي دەڭگەيدە كومەك قولىن سوزادى دەپ ويلامادىق. قيىن ساتتە ءبىزدىڭ جاعدايىمىزعا بەي-ءجاي قاراماعان، قول ۇشىن سوزىپ، ءبىز ءۇشىن الاڭ بولعان بيلىك وكىلدەرىنەن باستاپ، جۋرناليستەر قاۋىمىنا، حالقىمىزعا بارىنە العىسىمىز شەكسىز. ريزاشىلىعىمىزدى ءبىلدىرۋ ءۇشىن ەلباسىعا العىس حات جولداساق دەپ نيەتتەنىپ وتىرمىز»، - دەيدى ەرلى-زايىپتى جاستار.
نۇرسۇلتان مەن الماگۇل تالدىقورعاندا ءبىر سىنىپتا بىرگە وقىپ، 8 جىل بويى قىز بەن جىگىت بولىپ ءجۇرىپ قوسىلعاندارىن ايتادى. ولار سول كۇنگى جانتۇرشىگەرلىك كولىك اپاتىن ۇمىتقىلارى كەلەدى. سول سەبەپتى دە ب ا ق وكىلدەرىنىڭ وزدەرىن مازالاعانىن قالامايدى.
«تۇرىكتىڭ تاكسي جۇرگىزۋشىسى ءبىزدى امان الىپ قالدى. ەگەر سول كۇنگى كولىكتە باسقا ادام بولسا ءبىزدىڭ جاعدايىمىزدىڭ قالاي بولاتىنى دا بەلگىسىز. ءبىز وسى جايلى تۇركيانىڭ ب ا ق وكىلدەرى ارقىلى دا ايتتىق. شىنىمدى ايتسام، ءوزىم كولىك اپاتىنا تۇسكەن ءساتتى بىلمەيمىن. ەسىمدە ەشتەڭە جوق. اۋرۋحاناعا ەس-ءتۇسسىز جەتىپپىن. قورقىنىشتى ءتۇس سياقتى. ءتىپتى العاشقىدا بىزگە دارىگەرلەر ءتورت دوسىمىزدىڭ قايتىس بولعانىن ايتتى. زارەمىز ۇشتى. قايتىس بولعان تۇرىكتىڭ ازاماتتارى ەكەنىن ارتىنان بىلدىك. ەڭ باستىسى، تۇركياعا بارعان جەتەۋىمىز دە امانبىز»، - دەيدى تالدىقورعاندىق الماگۇل.
ەستەرىڭىزگە سالا كەتەيىك، 21 -قىركۇيەكتە تۇركيانىڭ كەمەر قالاسى ماڭىندا بولعان جول اپاتى سالدارىنان 7 قازاقستاندىق اۋرۋحاناعا تۇسكەن ەدى. دەر كەزىندە كورسەتىلگەن مەديتسينالىق كومەك پەن حيرۋرگيالىق وتا جاستاردىڭ جانىن ساقتاپ قالدى. تۇركيادا جول اپاتىنا ۇشىراعان جەرلەستەرىمىزدىڭ بارلىعى ەلگە امان-ەسەن ورالدى. قازىر ولار ەلىمىزدىڭ ەمدەۋ مەكەمەلەرىندە ءتيىستى ەم-دومىن الىپ جاتىر.
