ازيا ويىندارى: قازاقستان ءتورتىنشى ورىندا كەلەدى

جارىستىڭ بەسىنشى كۇنىندە قازاقستان سپورتشىلارى سەگىز مەدال ەنشىلەدى - ءبىر التىن، ەكى كۇمىس جانە بەس قولا.
«التىندى» - ايدوس قۇلمانبەتوۆ (بەلبەۋ كۇرەسى)، «كۇمىستى» - پەريزات جاقىپبەكوۆا (بەلبەۋ كۇرەسى) جانە ەرنار شىمبايەۆ (بيليارد)، «قولانى» بەكبول نۇرلان ۇلى، ەرسۇلتان مۇزاپپاروۆ (ەكەۋى دە بەلبەۋ كۇرەسىنەن)، ناميكا نەفتاليەۆا، ەرقانات وسپان جانە الماز سارسەنبەكوۆ (مۋاي-تاي) جەڭىپ الدى.
بەس كۇنگى جارىستان كەيىن قازاقستان 30 مەدالمەن (7-8-15) ءتورتىنشى ورىنعا ورنالاسىپ وتىر.
ۇزدىك ۇشتىك كەلەسىدەي: ءبىرىنشى ورىن تۇرىكمەنستاندا - 127 مەدال (53-37-37)، ەكىنشى ورىن يراندا - 39 مەدال (10-6-23) جانە ءۇشىنشى ورىن وزبەكستاندا - 57 مەدال (7-16-34).
ايتا كەتەيىك، قازاقستان ازيا ويىندارىنىڭ ءتورتىنشى كۇنگى قورىتىندىسى بويىنشا 22 (6-6-10) مەدالمەن 3-ورىنعا كوتەرىلگەن ەدى. ءبىرىنشى ورىندا تۇرىكمەنستان - 89 (43-28-18)، ەكىنشى ورىندا يران - 26 (7-4-15) ەلدەرى بولدى.
بۇعان دەيىن حابارلاعانىمىزداي، اتالمىش بايراقتى دودادا ەل نامىسىن قورعاۋعا قازاقستاننىڭ 150 سپورتشىسى اتتاندى. ولار جارىستىڭ 17 تۇرىنەن سىنعا تۇسۋدە.