نازاربايەۆ تۇرىكمەنستان پرەزيدەنتىمەن نە تۋرالى سويلەستى؟
تۇرىكمەنستان پرەزيدەنتى جاۋىنگەرلىك ونەر تۇرلەرى بويىنشا جابىق عيماراتتا وتەتىن V ازيا ويىندارىنىڭ اشىلۋ راسىمىنە قاتىسۋعا شاقىرۋىن قابىل الىپ، قوناقجاي تۇرىكمەن جەرىنە كەلگەنى ءۇشىن نۇرسۇلتان نازاربايەۆقا العىس ءبىلدىردى.
«بۇل - ورتالىق ازيا ءوڭىرىنىڭ بارلىق ەلدەرىنە ورتاق مەرەكە. بۇل - ءبىزدىڭ نيەتتەستىگىمىز بەن اۋىزبىرشىلىگىمىزدىڭ كورسەتكىشى. وسى ويىندارعا 64 ەلدىڭ وكىلدەرى قاتىسىپ وتىر، سونداي-اق بىرىككەن ۇلتتار ۇيىمىنىڭ ءوتىنىشى بويىنشا 65- ەل رەتىندە بوسقىنداردان تۇراتىن قۇراما قاتىسۋدا. ولار وسى ويىنداردىڭ تۋىن ۇستاپ سىنعا تۇسەدى، - دەدى گۋربانگۋلى بەردىمۇحامەدوۆ.
تۇرىكمەنستان كوشباسشىسى استاناداعى حالىقارالىق "ەكسپو-2017" مامانداندىرىلعان كورمەسىنىڭ جوعارى دەڭگەيدە ۇيىمداستىرىلعانى وزىنە ۇمىتىلماس اسەر قالدىرعانىن ەرەكشە اتاپ ءوتتى. قازاقستان پرەزيدەنتى جاۋىنگەرلىك ونەر تۇرلەرى بويىنشا جابىق عيماراتتا وتەتىن V ازيا ويىندارىنىڭ اشىلۋ راسىمىنە قاتىسۋعا شاقىرعانى ءۇشىن گۋربانگۋلى بەردىمۇحامەدوۆكە ريزاشىلىق ءبىلدىرىپ، وسىنداي ءىس-شارالاردى وتكىزۋدىڭ ماڭىزدى ەكەنىن ايتتى.
«مەن ءسىزدى وسى ازيا ويىندارىنىڭ وتۋىمەن قۇتتىقتايمىن. كوپتەگەن سپورت نىساندارى سالىندى، الداعى ۋاقىتتا ولار حالىقتىڭ يگىلىگىنە قىزمەت ەتەتىن بولادى. مۇنداي ءىس-شارالار ارقىلى تۇرىكمەنستاننىڭ الەمگە تانىمالدىعى ارتا تۇسەدى. بيىل قازاقستان دا اۋقىمدى سپورت سايىسىن - 28- دۇنيەجۇزىلىك قىسقى ۋنيۆەرسيادانى وتكىزدى. جالپى، ءبىزدىڭ وڭىردە ءىرى حالىقارالىق ءىس-شارالاردى وتكىزۋ وتە ماڭىزدى»، - دەدى نۇرسۇلتان نازاربايەۆ.
مەملەكەت باسشىسى كورشىلەس تۇرىكمەنستانمەن باۋىرلاس قارىم-قاتىناستارىمىزدى اتاپ ءوتىپ، ەكىجاقتى ىنتىماقتاستىقتى ودان ءارى دامىتۋ قاجەتتىگىنە توقتالدى. «ءسىزدىڭ قازاقستانعا جاساعان ساپارىڭىزدان كەيىن كوپ نارسە جاسالدى، مەملەكەتارالىق كوميسسيا جۇمىس جۇرگىزۋدە. ءبىزدىڭ ەكونوميكا سالاسىنداعى پەرسپەكتيۆامىز جاقسى دەپ ويلامىن. مەن سىزدەرگە وزبەكستاننان كەلدىم، وندا مەملەكەتتىك ساپارمەن بولدىم. كوپ ماسەلە شەشىمىن تاپتى: شەكاراارالىق ىنتىماقتاستىق، اكسيزدەر، سالىق، تاسىمالداۋ سالاسىنداعى تاريفتەر. قازاقستان مەن وزبەكستان اراسىنداعى ساۋدا بىردەن ارتقانى بايقالادى. بيىل ول 35 پايىزعا ءوستى. مەن ەلدەرىمىز اراسىنداعى قارىم-قاتىناستار دا وسىلايشا كەڭەيە تۇسەدى دەپ ۇمىتتەنەمىن»، - دەدى مەملەكەت باسشىسى.
سوڭىندا قازاقستان پرەزيدەنتى تۇرىكمەنستان حالقىنا جانە تۇرىكمەنستان پرەزيدەنتىنە، سونداي-اق ويىندارعا قاتىسۋعا كەلگەن سپورتشىلارعا تابىس تىلەدى. وسىعان دەيىن مەملەكەت باسشىسىنىڭ جۇمىس ساپارىمەن اشحابادقا كەلگەنى حابارلانعان بولاتىن. سونىمەن قاتار، نۇرسۇلتان نازاربايەۆ جاۋىنگەرلىك ونەر تۇرلەرى بويىنشا جابىق عيماراتتا وتەتىن V ازيا ويىندارىنىڭ اشىلۋ راسىمىنە قاتىسىپ، قازاقستاننىڭ ۇلتتىق قۇراماسىمەن جانە سپورت دەلەگاتسياسىمەن كەزدەسەتىنى ايتىلعان بولاتىن.
Tengrinews.kz
