قوستانايدا كەيكى باتىردىڭ باس سۇيەگى جەر قوينىنا تاپسىرىلدى - فوتو

قوستاناي. قازاقپارات - قوستاناي وبلىسى، امانگەلدى اۋدانىندا كەيكى كوكەمباي ۇلى كەسەنەسى بوي كوتەردى، دەپ حابارلايدى قازاقپارات ءتىلشىسى.

 اراعا عاسىرعا جۋىق ۋاقىت سالىپ، بىلتىر ەلگە ورالعان باتىردىڭ سۇيەگىن جەرلەۋ ءراسىمى امانگەلدى اۋدانىندا ءوتتى. تاريحي وقيعانىڭ كۋاسى بولماققا الىس- جاقىننان تانىمال تۇلعالار كەلدى. ولاردىڭ اراسىندا ق ر پارلامەنتى دەپۋتاتتارى، قوعام قايراتكەرلەرى، اقىن- جازۋشىلار بار.

 باتىر سۇيەگىن جەرلەۋ ءراسىمى ساعات 11:00-دە باستالدى. الدىمەن، بابا رۋحىنا قۇران باعىشتالدى. سۇيەكتى جەر قوينىنا تاپسىرۋ راسىمىنە ق ر مەملەكەتتىك حاتشىسى گۇلشارا ءابدىحالىقوۆا، ق ر مادەنيەت جانە سپورت ءمينيسترى ارىستانبەك مۇحامەدي ۇلى، قوستاناي وبلىسىنىڭ اكىمى ارحيمەد مۇحامبەتوۆ، ۆەنگريانىڭ قازاقستانداعى ەلشىسى باراني اندراش، ق ر پارلامەنتى دەپۋتاتى قۋانىش سۇلتانوۆ، جازۋشى ءسابيت دوسانوۆ قاتىستى.

«جاڭا مەموريالدىق كەشەننىڭ قۇرىلىسى بويىنشا بارلىق جۇمىستار بەلگىلەنگەن ۋاقىتتا اياقتالدى. ونىڭ بارىسىن ۇنەمى قاداعالاپ وتىردىق. مىنە، ۇكىمەتتىڭ كەلىسىمىمەن باتىر سۇيەگىن سالتاناتتى تۇردە جەرلەۋ ءراسىمىن ۇيىمداستىرىپ وتىرمىز. كەيكى باتىردىڭ تاريحتاعى ورنى ەرەكشە. مىناداي ساۋلەتتى كەسەنە جاستارىمىزدىڭ بويىنا رۋح بىتىرەدى، وتانعا دەگەن سۇيىسپەنشىلىگىن ارتتىرۋعا سەپتىگىن تيگىزەدى»، - دەدى قوستاناي وبلىسىنىڭ اكىمى ارحيمەد مۇحامبەتوۆ.

 جيىندا كەيكى باتىر تۋرالى قوعام قايراتكەرلەرى دە پىكىر ايتتى. «كەيكى كوكەمباي ۇلى - ۇلتىنىڭ ازاتتىعى جولىندا كۇرەسكەن ۇلت قاھارمانى. ونىڭ جارقىن بەينەسى ۇرپاقتان- ۇرپاققا جەتىپ، ەرلىگى ەلىن رۋحتاندىرىپ تۇرا بەرمەك»، - دەدى جازۋشى سابيت دوسانوۆ.

كەيكى باتىر ۇرپاقتارى اتىنان سەرىك اقىلباي ءسوز سويلەپ، عاسىر بويى سىرت ەلدە جاتقان باتىر سۇيەگىن ەلگە اكەلۋگە سەبەپشى بولعان ەلباسىنا العىسىن ءبىلدىردى.

 باتىر جولاي ۇلى