تەڭگە مەن يۋان اراقاتىناسى جاڭا دەڭگەيگە كوشتى
جالپى، KACE- دە تەڭگە- يۋان ارقىلى ساۋدا جۇرگىزۋ 2014 -جىلى باستالعان، - دەپ حابارلايدى ك ت ك ارناسى.
قىتاي ەكونوميكاسى قازاقستان يمپورتىنىڭ ايتارلىقتاي بولىگىن قامتاماسىز ەتىپ وتىرعاندىقتان، ەكى ەل اقشالارىنىڭ تىكەلەي بايلانىسىن ارتتىرا ءتۇسۋ وتە ماڭىزدى دەيدى قارجى ماماندارى. سول ءۇشىن بۇگىن قازاقستان قور بيرجاسىندا ت+2 ءتارتىبى بويىنشا تەڭگە- يۋان ۆاليۋتاارالىق ساۋداسىن جۇرگىزۋگە باستاما بەرىلدى.
ول بويىنشا، كەلىسىم جاساعان تاراپتار ءوز مىندەتتەمەلەرىن ورىنداۋدى ەكى كۇنگە دەيىن سوزا الادى. ەكىنىڭ بىرىنە تۇسىنىكتى بولا بەرمەيتىن مۇنداي شارالار، قارجى ماماندارىنىڭ ايتۋىنشا ەكى ەلدىڭ كاسىپكەرلەرىنە ءتيىمدى بولماق. ايتا كەتەرلىگى، قىتاي سوڭعى جىلدارى ءوز اقشاسىنىڭ الەمدىك نارىقتاعى بەدەلىن ارتتىرۋعا كادىمگىدەي كۇش سالىپ جاتىر.
«قازىرگى ساتتە قىتاي يۋانى وڭتۇستىك- شىعىس ازيانىڭ ءبىرقاتار ەلدەرىندە ەركىن اينالىمدا ءجۇر»، - دەيدى قىتايدىڭ الماتىداعى باس كونسۋلى جاڭ ۋەي.
مالايزيا، وڭتۇستىك كورەيا، كامبودجا سىندى ەلدەردە قىتاي يۋانى ۆاليۋتا رەزەرۆى رەتىندە ساقتالىپ تۇر. ال بىلتىر قازان ايىندا حالىقارالىق ۆاليۋتا قورى قىتاي اقشاسىن مۇشەلىككە الدى. ياعني، حالىقارالىق ساۋدا اينالىمىندا يۋانمەن ەسەپ ايىرىسۋعا، قور ساقتاۋعا بولادى دەگەن ءسوز. ونىڭ ەكپىنى ەندى قازاقستاندا دا قاتتى سەزىلە باستادى.
«بيىلعى 8 اي ىشىندە يۋان- تەڭگە جۇبىنىڭ ساۋداسى 77 ميلليون يۋان، ياعني 3 ميلليارد 600 ميلليون تەڭگەنى قۇرادى. وتكەن جىلدىڭ سايكەس كەزەڭىمەن سالىستىرعاندا 59 پايىزعا ءوسىم بار»، - دەيدى قازاقستان قور بيرجاسىنىڭ باسقارما ءتورايىمى الينا الدامبەگەن
ءتول اقشاسىن بارىنشا ينتەرناتسيالاندىرىپ جاتقان اجداھا ەل ساۋدا- ساتتىق بويىنشا قازاقستاننىڭ ءۇشىنشى سەرىكتەسى. سوندىقتان، قىتاي يمپورتىن تىكەلەي تەڭگە- يۋان باعامىمەن ساتىپ الۋ قازاقستانعا دا ءتيىمدى ەكەن.
ەڭ باستىسى، ەكى ەل قوس ۆاليۋتانىڭ اراسىن نىعايتۋ ارقىلى دوللار كۋرسىنا دەگەن تاۋەلدىلىكتەن قۇتىلامىز دەپ قۋانىپ وتىر. ءبىراق، يۋاننىڭ قازاقستان نارىعىنا ورنىعىپ الۋ ىقتيمالدىعى تۋرالى ەشكىم ايتپايدى. قازىردىڭ وزىندە ەلىمىزدە قىتايلارمەن قاتىسى بار 985 كومپانيا جۇمىس ىستەيدى. ولاردىڭ دا قىزىل اقشانىڭ شاپاعاتىن كۇتىپ وتىرعانى جاسىرىن ەمەس.
