فلوريدا تۇرعىندارىنىڭ قاۋىپسىز جەرگە كوشۋگە ۋاقىتى قالعان جوق

استانا. قازاقپارات - فلوريدا تۇرعىندارىنا جاقىنداپ كەلە جاتقان «يرما» داۋىلىنىڭ قاۋپىنە بايلانىستى ءوز ۇيلەرىنەن تاستاپ، قاۋىپسىز جەرگە بارىپ پانالاۋدى، سونداي-اق ساياحاتقا شىقپاۋدى ايتىپ جاتىرمىز، دەپ مالىمدەدى فلوريدا گۋبەرناتورى ريك سكوتت.

ونىڭ سوزدەرىنە قاراعاندا، قاۋىپ-قاتەر ايماعىنان كەتۋگە ەندى كەش، دەپ جازادى BBC.

فلوريدادا جەرگىلىكتى بيلىك 6,3 ميلليون تۇرعىنعا ەۆاكۋاتسيالانۋعا بۇيرىق شىعارعان، بۇل شتات حالقىنىڭ تورتتەن ءبىرى دەگەن ءسوز. بۇعان دەيىن داۋىلدىڭ كۋبادا ويران سالۋىنىڭ سالدارىنان نەسەر جاڭبىر جاۋىپ، كۇشتى جەل تۇرعان.

جەرگىلىكتى ۇكىمەتتىڭ مالىمدەمەسىنە سۇيەنسەك، ول جاعالاۋداعى ەلدى مەكەندەر مەن كۋرورتتارعا زور شىعىن كەلتىرىپ، بىرنەشە اۋداندى ەلەكتر جارىعىنسىز قالدىرعان. ب ا ق مالىمەتتەرى بويىنشا، كۋبادا جەلدىڭ جىلدامدىعى ساعاتىنا 250 كيلوممەترگە، تولقىنداردىڭ بيىكتىگى جەتى مەترگە دەيىن جەتكەن.

ميلليوننان استام كۋبالىق داۋىلدان ءقاۋىپسىز جەرگە كوشىرىلگەن، قۇربان بولعاندار تۋرالى مالىمەتتەر جوق. «يرما» داۋىلىنىڭ قۋاتى سەنبى كۇنى بەسىنشى دەڭگەيدەن ءۇشىنشى دەڭگەيگە دەيىن تۇسكەن، ءبىراق سينوپتيكتەر داۋىل فلوريداعا جەتكەنشە بارىنشا كۇشەيىپ كەتۋى مۇمكىن دەپ قاۋىپتەنەدى.